- Ruata
Hyundai Motor India chuan an micro SUV thar tur, a codenamed atana Hyundai Ai3 tih an vuah chu tichhuak turin an inbuatsaih mek.
Media report thenkhatin an tarlan danin lirthei thar tur hi hi July thla tir lamah Hyundai chuan a tam tham siamchhuah hna an tan ang a, August 2023-ah hralh chhuah a nih hmel a. Company lam atangin thuchiang erawh a la awm mai turah beisei ila.
Market-a a rawn thlen hma hian South Korea company hian he an compact SUV thar tur hi a teaser thlalak hmasa ber chu “Coming soon to take you places” tih inziak nen an tichhuak a. He thu awmzia chu ‘Hmun hrang hranga fan pui tur chein a lo chhuak tep e’ tih te pawhin a dah theih ang a. India rama South Korean lirthei siamtu lar, Hyundai-in SUV an tihchhuah zingah chuan a te ber leh man tlawm ber a ni dawn a. Hyundai micro SUV thar tur hi a lo chhuah hunah chuan Tata Punch leh Maruti Suzuki Ignis te nen market lamah chuan an inhmachhawn dawn a. He micro SUV huang zim te, lirthei pawh duhthlan tur a tam lohnaah hian lirthei thar tha leh changkang tak a lo chhuak dawn a, hei hi lirthei market tihausatu tur hmasawnna tha tak a ni a, leitute tan pawh duhthlan tur a ti tam sawt dawn a ni.
Hyundai micro SUV lo chhuak tur hi Grand i10 Nios’ K1 platform-a nghahchhana duan a ni dawn a, a design thenkhat chu South Korea-a hralh thin Casper nen an inzul viau dawn a ni. Hyundai design language thar a hmang dawn a, a pian lamah chuan a tung deuh ang a, thep zai ang chu a ni dawn chiah lo a ni.
He micro SUV thar tur hian split headlamp setup a nei dawn a, LED DRL-ah ‘H’ pattern kan hmu ang a, fog lamp bial a nei dawn bawk a ni. A variant hniam lamah chuan alloy wheel awm loin company dang lirtheiah pawh kan hmuh ang, steel wheel rim kan hmu ang a, a man to leh variant sang hoah chuan alloy wheel kan hmu thung dawn dawn a ni. Hyundai Ai3 mini SUV hian angular tail lamp a nei dawn a, a design pawh a changkang viau dawn a. A sei zawng zawng hi meter 3.8 vel a ni dawn a, heti hian market danga kan hmuh 3595mm a sei Hyundai Casper aiin a sei deuh dawn a ni.
A chhunglam chanchin kimchang leh kentel tur te hi chiang taka hriat theih a la ni lo a. Hetihrual hian Hyundai micro SUV thar hian Apple CarPlay leh Android Auto connectivity nei touchscreen infotainment system bakah semi-digital instrument cluster, sunroof, automatic climate control, connected car tech leh rear AC vents te a neih ngei beisei a ni.
A khawl lamah chuan Hyundai Ai3 hian 1.2L petrol engine a hman hmel a, hei hian power lamah 83bhp a pechhuak thei a, torque 113.8Nm a pe thei bawk. Hei hi Grand i10 Nios khawl ang a ni. Manual leh automatic gearbox te duhthlan tur a awm beisei a ni bawk a ni.
Tarlan tawh angin Hyundai lam atang hian chiang taka he lirthei chanchin kimchang hi puanzar a la ni lo a. Kan han tarlan aia chiang leh fiah zawk hian company lam atangin chanchinthar a rawn awm thuai beisei a ni a, micro SUV lam awn deuhte tan chuan lo nghah hret a fuh hmel viau a, a bik takin Hyundai lirthei ngainatute tan chuan lirthei nghahhlelhawm tak a ni awm e.