Kum li chhunga Maoist helhovin India sipai an kah hlum hnem ber tum, Inrinnia thleng chu helho chuan anmahni beih tumtute chet dan an hre lawk nia hriat a ni.
Inrinnia inkahnaah hian ramhnuaiah mi 17 an thi nghal a, mi 22 zet an thi a. Naxal hel 400 rual velin hmun thum atangin sipaite hi hualin machinegun leh IED hmangin an kap nia hriat a ni.
Sipaite hian helai hmunaah hian Madvi Hidma, People’s Liberation Guerrilla Army (PLGA) battalion number 1 commander leh an hruaitu pakhat, Sujatha an awm nia thu an dawn bawhzui a ni a. Naxal helhovin inringlawk taka an lo lambun tak avangin an thudawn hi dawt a nih a rinawm hle.
Sipaite hian an thudawnna anga commander leh a pawlte awmna hmun an thlen chiah hian Maoist 400 rual velin hmun thum atangin an hual bet a. CRPF specialised jungle warfare unit CoBRA leh sipaite hi an bei ta a ni.