Beisei ang season hmang lo club pahnihte Premier League-ah an intawng a, manager nei lo Chelsea in Liverpool mikhualin goal inpe lovin an inhnehtawk.
Stamford Bridge a Thawhlehni zan inkhelah Chelsea in Bruno Saltor hnuaiah a vawikhatna atan inkhel an hmachhawn a. Lehlamah Liverpool manager Jurgen Klopp-a’n Manchester City laka tlawm team atangin mi paruk a thlak danglam.
Rinlawk ang ngeiin attacking football hmuh tur a awm nghal mai lova, player te an fimkhur. Chelsea chu chance nei tha zawk an ni a, Mateo Kovacic goal khung tur Ibrahima Konate petchhuah hman a goal teuh a. Huntha dang a neih a khung lo ho viau bawk.
Kai Havertz leh Reece James ten handball leh offside avanga goal pawm loh nei ve ve.
Liverpool in full-back rinrawl Trent Alexander-Arnold leh Andy Robertson te leh Mohamed Salah te an awl tir a, goal hlauhawm siam tam lovin Chelsea keeper Kepa Arrizabalaga tan hna an siam mang lo.
Interim boss Bruno Saltor chuan, “Chak thei turin chance kan insiam hnem tawk a, goal hnih pawm loh kan nei. Player ten theihtawp an chhuah a, kha bak beisei theih a ni bik lo.” tiin a sawi.
Klopp pawhin, “Kan dinhmun hi kan paltlang a, kan sualchhuah a ngai. Tam tak tan pawm harsa nimahsela hei hi kan pawm a ngai a ni.” a ti ve bawk.