World Health Organisation (WHO)-in report a siam tharah chuan khawvela puitling awm zinga paruka pakhat zel chuan fa neih theih loh harsatna an nei tih an sawi.
Sum leh pai la lut tam, tam vak lo leh tlemna rama chengte dinhmun a inang lo bawk tih an tar lang tel.
Ram hausaah chuan puitling zinga fa nei thei lo hi 17.8% an nih laiin rem rethei zawkah chuan 16.5% an ni ve thung.
WHO hian ram tinte chu miin fa an neih theih nana enkawlna lam titha turin a ngen bawk.
WHO-in fa nei thei lo a tihte hi thla 12 chhung invenna engmah hmang lova pangngai taka mu dun thinten nau an pai miah lote hi an ni.
Hmeichhia bikah chuan chhul chak lo enkawl hmang emaw, zai hmangin emaw nei thei tura tih dan a awm a. Nupate chu intrauterine insemination (IUI) emaw, in vitro fertilisation (IVF) emaw hmangin nau an neih theih dan a awm bawk.
IUI leh IVF ti tur hi chuan kalphung zawm tur tam tak a awm.
WHO chuan ram tam zawkah chuan nau nei thei tura inenkawlna, fertility treatment chu mi malin tum lovin sorkarin a tum thin niin an sawi a, hei hian sum harsatna avanga nei thei lo hlen tur tam tak a pui niin an tar lang.
Report-ah hian ram rethei zawka chengte chuan hausaa chengte aiin nau nei thei turin an lak luh atanga tehin sum an hmang tam zawk tih tar lan a ni.
Inenkawlna man sang lutuk leh khuarel pangngai anga nau pai theih loh beidawnna avanga engmah ti zui lova awm chu tam takin an neih loh hlen phah niin an tar lang bawk.
“Report hian nau neih theih lohna hian tumah a thliar lo tih a chiang hle,” tiin WHO Director-General Dr Tedros Adhanom chuan a sawi.