Aizawl: Tlabunga Rural Development Block office hawn chu rualkhai taka hmasawnna kaltirna leh ram leh hnam humhalhna tura ban rinawm tak phunnaah an ngaih thu Rural Development Minister Lalruatkima’n a sawi.
March 25, 2022-a Council of Ministers thukhawmin a lo pawm tawh, Tlabung RD Block dinna turin nimin khan pisa atana luah lailawk tur chu RD minister-in a hawng.
Hawnna inkhawmah Lalruatkima chuan Tlabungah RD Block hawn a nih loh chuan kum 30 vel ral hnuah thangtharten an la dem ngei ngei dawn tih sawiin, chumi a thlen lohna tur chuan kum 150 tlin champha lawm thei khawpa khaw pawimawh hmasa leh upa, Tlabungah RD Block chu ngaihtuahna thui tak seng chungin an hawng ta tih a sawi.
Tlabung RD Block thar hawnna inkhawmah khualzahawm, Lunglei HPC Vice Chairman Lawmawma Tochhawng leh West Tuipui bialtu MLA Nihar Kanti Chakma ten thu an sawi bawk.
March 25, 2022-a Council of Ministers thukhawm chuan Kawrtethawveng RD Block leh Tlabung RD Block siam tura rawtna lut a pawm a. November 1, 2022 khan block thar pahnihte enkawl zuina turin fiancne department-in Rs nuai 66.42 a ruahman a. Tlabung BDO office thar, officer quarter leh staff quarter turte tan ruahmanna pawh siam fel vek tawh niin, a sak hna hi tan nghal thuai tura tih a ni.
Tlabung RD Block hi Mizorama RD Block 28-na niin May 20, 2022 khan Lungsen RD Block leh Bunghmun RD Block atanga then hran a ni a. A chhungah hian village 17 leh sub village 10 a awm.
Tun dinhmunah Tlabung RD Block office bul tan tur hian BDO hmasa ber ni turin Mizoram sorkar chuan H Zonunmawia, SDO(C) Tlabung a ruat a, MGNREGA atangin thawktu 16 an awm tawh.
October 7, 2022 khan Tlabung RD Block thar vil tur hian post hrang hrang BDO, assistant, inspector of statistics, UDC leh LDC pakhat theuh bakah IV Grade pahnih chu sorkarin a siam thar bawk.