Kum 2023-24 academic session atan Mizorama zirna inte chu nimin atang khan hawn tan a ni a, sorkar ruahman angin sorkar sikula zirlaiten uniform inang an ha tan.
School Education department ruahmanna angin academic year thar atan nimin khan zirna in hawn tan a ni a, sorkarin ruahmanna thar a neih sorkar sikula uniform inang tlang hak chu a taka kalpui tan a ni a. Primary school zawng zawnga zirlaiten kekawr leh pawnfen a dum pawl leh kamis var ban bul an ha a, middle school-ah light grey leh kamis var ban bul, high school leh higher secondary school zirlaiten kekawr leh pawnfen dum leh kamis var ban tlawn an ha a ni.
The Zozam Times chuan nimin khan Aizawl khawpui chhunga sorkar sikul thenkhat a tlawh kual a, chungah chuan zirtirtute chuan sikul kai tan nia uniform inang tlang hak a nih theih nan hma la mah se, zirlai zingah uniform ha ve thei rih lote pawh an awm tih an sawi.
Sorkarin ruahmanna thar a siam hian harsatnate pawh a thlen a, thingtlang lamah chuan puan thuitute indaih tawk lohnate awmin, sikul pum puia uniform thar ha lo vekte pawh an awm.
The Zozam Times-in zirtirtu thenkhat a kawm kualte chuan sorkarin ruahmanna thar a siam chu tha viau angin lang mah se, hun rei tak chhung uniform atana an lo hman tawhte thlak a ni ta erawh uiawm an tih thu an sawi a. “Kan sikul zirlaite hriat hrante pawh a har tawh dawn a, kan sikul uniform rawng bika kan lo ngaih kha tunah chuan a awm thei dawn ta lo,” an ti.
Tar lan tawh thin angin, Human Resources Development Board chuan sorkar sikula lut zirlaiten uniform inang tlang hak chu tha tiin, sorkarah rawtna a thlen a. Hei hi sorkar pawhin pawmin nikum June thla khan school education department-in academic session tharah uniform inang hman a ni dawn tih hriattirna a lo tichhuak tawh a ni.