Khawvel huapa buhfai hralh chhuak hnem pathumna, Vietnam chuan thangkhatlian hnuah a khingpui, India hnen atangin buhfai a leichhawng ta.
Vietnam hian tun lai hian kum kaw chhunga buhfai to ber tum an ram chhungah an tawk mek niin tarlan a ni.
Buhfai inlei chhawnna hian Asia khawmualpuiah buhfai a harsa chho dawn tih a lantira ngaih a ni a, kuminah hian a man pawh a san a rinawm bakah Thailand leh Vietnam pawhin khawvela buhfai hralh chhuak hnem bertu, India lam an hawi rin a ni.
India rama sumdawngte hian January leh February chhugin buh her sa tonne 70,000 thawn chhuak tura intiamna an ziak a. Hei hi tonne khat zelah $310 man tura tih a ni a, free-on-board (FOB) hmanga kalpui tum a ni.
“A vawi khatna atan Vietnam-ah kan thawn chhuak dawn,” tiin BV Krishna Rao, Rice Exporters Association president chuan a sawi a. “India miten a man kan chhiar hi chu tha tak a ni. Man insan hleih lutuk avang chauhin kan thawn chhuah theih phah a ni,” tiin Vietnam-a buhfai man sang lutuk chu a sawi bawk.
Supply tlakchhiat avang leh Philippines lam an dawr nasat avangin Vietnam-ah hian buhfai man a sang a ni.
Vietnam-a buh her sa 5% vel chu tonne khatah $500-505 vel a ni a. India erawh chuan tonne khatah $381-$387 vel a chhiar thung.
Supply sem chhuah tur a tlakchhiat zel avang hian sub-Saharan Africa velah chuan harsatna a lian dawn hle a ni.