Aizawl: Aizawl South II bialtu MLA Lalchhuanthanga’n a bial chhung, Mualpui Salem venga sa talhna hmun, Rural Animal Slaughter House a tlawh.
Lalchhuanthanga’n a bial chhunga sa talhna a tlawhnaah hian AH&Vety Department hotute chuan thla khat chhungin ran 500-600 vel talh reng ang an nih thu te, a bikin Zirtawpni-ah ran talh an tam zual a, ran 70-80 vel talh ziah ang an nih thu te an sawi.
Ran talhna hmuna thli leh rim chhuak chu a chhehvela chengte tan hriselna kawngah a him lo hle a. A thli paihna drain mumal taka siam ngai te, Effluent Treatment Plant (ETP) leh Separation Tanky siam zawh hlim atanga thli put chhuak avangin hman hleihtheih loha a awm bakah a panna kawng chhia avangin a chhawrtuten harsatna an tawh nasat thu leh thawktu VO post pahnih awmah mi pakhat chiah a awm a, hei pawh hi hnawh khah thuai a tul thu an sawi.
Aizawl South II bialtu MLA hian sorkarin he sa talhna hmun hi ngaihven rang se a duh a, a chhehvela khawsate leh a chhawrtuten harsatna an tawh mek hi enfel thuai nise, fur ruahtui tlak hma ngeia a tlabal lai apiang thawm that thuai a duh thu a sawi.