Chelsea chuan an club legend Frank Lampard-a lam an hawi a, manager Graham Potter an ban hnuah season tawp thleng an club enkawl lailawk turin English midfielder ropui thin an ko kir.
Blues enkawltu tur inrinsiakna hi a nasa hman viau a, manager awl lai hrang hrangte nen sawizawm an ni. Hei vang hian Chelsea thutlukna siam hi rin loh lam deuh a ni a, nimahsela club lamin duhthlan theih tur awmte kara an manager duh ang tak lakluh an tum.
Manager thar tur uluk taka an dap chhungin Lampard chuan hna a thawk dawn tih an sawi.
“Ka kova tla ah chauh ka insawrbing”
Kum 44 mi Lampard hi July 2019 atanga kum 2021 January thla thleng kha Chelsea manager nghet a lo ni tawh. Nimahsela tunah erawh a dinhmun chu a danglam a, a hmalam hun a ngaihtuah lo tih a sawi.
“Ka theihtawp a tha in he hna hi thawh ka duh, a bak chu kan la hre chho mai ang. Tun hi thildang lo ngaihtuah a, lo thlirna hun a ni lo.”
“Ka hma hun chungchangte hi zawh ka ni fo dawn tih ka hre lawk sa. Thil ka thlir thiam ve vek, nimahsela a pawimawh ber chu tuna kan hmabak, kan hmachhawp awmah hian insawrbing a, hna tha taka thawh a ni.” tiin Lampard chuan an dinhmun siamthat phawt chu a pawimawh tih a sawi.
Chelsea hi Premier League-ah 11-na an ni mek a, palina a awm Manchester United nen an inkarah point 14 a awm. Tun season-ah Pound maktaduai 550 player lak nan an hman hnuah beisei an pha lo.
Lampard chuan match 648 a lo khelh tawhna club a kir chu thutlukna har a nih loh thu a sawi tel. “Hei hi ka inpui a ni a, he club hian ka thinlungah hmun pawimawh a chang tlat tawh.” tiin a club hlui in hun harsa a tawh laia puitu nih a tum thu a sawi.