India ramah COVID-19 kai hmuh an pun leh mek avangin Union Health Minister Mansukh Mandaviya chuan tun kar chhungin state tinte chu mock drill nei turin a ti.
Pathianni khan hri darh thar leh mek chungchangah hian hotu liante nen thukhawmin state-te chu inralring turin a ti.
State health minister leh principal leh additional chief secretary-te nena an inkawmnaah hian Mandaviya chuan influenza-like illness (ILI) leh severe acute respiratory infection (SARI) veite uluk lehzuala endik leh enkawl kawngah te, a kai an tamna lai bik hriat chhuah tum te, endik leh invenna pek tihtam leh damdawi in buatsaih that chungchangte an sawi.
Hri kai hmuh chhuahte chu eng ang chi ber nge an kai hriat theih nan genome sequencing tihchak te, mipuite hnenah hri laka himna tura invenna uar zawka kalpui tura tihthar lehte pawh a tel.
Sorkar laipui leh state-te chuan hri a len hmasak ang bawka thawhhona tha an mamawh thu pawh Mandaviya chuan a sawi bawk.
State health minister-te chu April 10 leh 11 hian damdawi inte an inbuatsaih lawk theih nan mock drill nei theuh turin a ngen a. District thuneitu leh damdawi lama thawktute inbuatsaih dan pawh April 8 leh 9-ah ennawn turin a ti bawk.