Kan ram inthlanpui kum kan hmang chho mek a. Kan political party te pawh mawngvawmba ang sekin kil tinah an rawn vak leh tan ta a. Mipui lakah an rawn inzuarin an policy leh an party thatna lai tur chu bye heart sa in an rawn tlangau pui leh miah miah tan ta. Midang sawichhe reng renga lo hmanhlel pawh kan hmu leh huai huai dawn a ni.
Inthlanna a an party a sawrkar ngei theihna tura an hmanraw neih that ber ber rawn thawhin a then chuan bial biala mipuiin rilru an pek theihna turin ram pum politics sawi lovin bial politics an rawn khel ang a. A thenin sem politics an rawn fak laiin a thenin an rawn sawichhe dawn a. Mipui chu thlem chitinin min rawn thlem leh tan dawn. Mipuite pawhin kan ram rorel khawl inbunnaah hian kan mawhphurhna kan hriat lehzual a ngaih kum a ni tih kan hriat a ngai.
Engpawh hi rawn sawi se kan ram kal tawh dan en in MLA tha nge pawimawh bera policy tha tihte hi kan lo buk thin tawh thin a. Helaiah hian mipui hian kan buk thelh reng mai niin a lang. Kan han inthlang a, a party chak berin sawrkarna an han siam a. Minister te an han invuah thliah thliah a. Kan minister hi chu a fel hmel khawp mai, kan MLA chu a rilru a puitling te kan ti thin. Amaherawh chu hun a kal a, bialtu MLA tha ai chuan a hotupa ber chief minister kha a thu leh ber tho a. MLA tha tak pawh bial khan nei mah ila chief minister a that loh chuan engmah an ti thei chuang lova. MLA kha an ni ve satliah tawp mai. Minister tur bial nihte hi kan han chak a. Mahse awmzia a awm tak tak thei si lo. Kan ram chuan hmasawn aiin state dangte hnung kan zui hnak hnak reng a. State dang nena khaikhina a hnufual lam zel kan ni tho mai. Chuvangin mipui hian kan thlan tur hi tu in nge ho tih kan thlir a ngai. Policy tha mahse a taka kalpuitu CM tha a ngai.
Chuvangin mipui hian CM tur mitthla chunga politics kan ngaihven a ngai a. Mi rinawm, ram hmangaihtu, hausak ve tum lo, mi nghet, ram leh hnam phatsan ngai lo, hmathlir nei thui kan zawn a ngai. Tuna kan politician te hi an thatna lai tam tak a awm vek a. Chung zingah chuan tunge mi rinawm bera kan ngaih tih hi ngaihtuah ila. Fukna zar thlaka thusawi ki thlak thinte, mipui tana tha aia tlin theihna zawnga thutiam zung zung mai thinte hi kan thlan chhuah leh hlauh chuan a pawi dawn em a. Hotupa ber tur hi eng mizia nge tihte hi i zir uluk hmasa ang u.