Israeli sipaite chuan thlawhna atangin Lebanon chhim lam leh Gaza Strip-a Palestinian hel pawl, Hamas a kap.
Sipaite hian Lebanon atanga Hamas-ten Israel hmar lam rocket-a Ningania vawi 34 an kah chhan let nana tih an ni tih an insawi.
Gaza-a helho pawhin Israel-in a kah hnuah hian rocket tam zawk an kap chhuak leh bawk.
Kar tira lama Israeli police-ten Jerusalem-a al-Aqsa mosque chu zan hnih ngawt an dap atangin boruak a tang hle.
A daptu police-te hi Islam-te hmun thianghlim ber pathumna mosque-a lo awm Palestinian-te nen an intibuai nual a, heng lai vel pumah thinrimna a nasa zui hle.
Kum 17 chhunga rocket-a an kah nasa ber tum thlengah hian Hamas chuan Lebanon atangin an kap tih an la sawi miah lo.
Mahse, hetih laia Beirut tlawhtu an hruaitu, Ismail Haniyeh chuan Israeli-ten na taka an nawr laiin Palestinian-te chu ‘ralthuam tungin’ an awm mai mai dawn bik lo tih a sawi thung.
Ningani zan zankhua khan Lebanese tuipui kam khawpui, Tyre atanga chhim lam km 5 vela awm, Rashidieh Palestinian refugee camp-ah thil puak vawi hnih hriat a ni.
Lebanese chanchinbute chuan hei aia chhim lam leh hret, al-Qulaila khaw dai pawh kah a ni tih an sawi a. Thlalakah chuan lei tenau deuh a chhia tih a lang.
Israel Defense Forces (IDF) chuan Lebanon-a ‘Hamas firfiakte hmunhma’ chu indo thlawhna hmanga an tihchhiat’ thu an tar lang.
“IDF hian Hamas firfiak pawl hi Lebanon-a an chet kan phal lo va, Lebanon pawhin khawi lam hawi maha silai an chelek chuan mawh a phur a ni,” an ti.
Hamas pawhin Zirtawpni zing khawvar hmaa Lebanon-a Tyre chhehvel kah a ni chu na takina n dem tih an sawi.
Gaza-ah hian Hamas hmun 10 vel kah fuh niin heng zingah hian lei hnuaia ralthuam siamna hmun te, weapons workshop pathum leh leiverh te pawh an tichhia tih IDF chuan a sawi.
Israeli sipaite an chet lai hian Gaza atangin Israel chhim lam hawiin rocket 44 vel kah a nih thu Israeli chanchinbute chuan an tar lang.
A tam zawk hi Israel-in a Iron Dome defence system hmanga an kah thlak a ni a, a dangte pawh hmun awlah a tla a; mahse, Sderot khawpuia in pakhat fuhtu a awm.
Ningani zana inkahnaah hian khawi lam ve ve mahah thi an awm hriat a ni lo.
Ningani chawhmu khan Lebanon atanga rocket kah sipaiin Israel-a pa pakhat a hliam thung a. Israeli sipaite chuan rocket 34 zinga 25 chu an kah thlak thu leh pangain an ram chhung a fuh thu an sawi.
Hmarthlanga ramri khua, Shlomi-ah rocket-in kawngpui a tichhe nual a, lirthei leh bank a tichhia a. Fassuta khuaah car a chhe bawk.
Prime Minister Benjamin Netanyahu chuan Israel-in a chhan letna chu ‘kan hmelmaten a man an pek ang zel’ a nih thu a sawi.
Israeli sipai thupuangtu chuan an ram kaptute hi Hamas an nih thu leh hel pawl dang, Islamic Jihad pawh an inrawlh theih thu a sawi.
Kum 2006-a thla khat lai Israel nena lo inbei tawh, Lebanese hel pawl, Hezbollah pawhin an hriatpui niin a sawi a, Iranian-te pawh an inrawlh mai theih thu a sawi.
Israel-in a kah atanga rei vak lovah Lebanon chhim lam zau tak thununtu, Hezbollah chuan Palestinian-ten pathian betu leh al-Aqsa mosque humhim nana an chetna leh hmelmaten pawn lama an beihna a chhan dan apiang chu ‘an thlawp’ tih an sawi.
Lebanon Prime Minister Najib Mikati chuan sipai chetna hrim hrim chu tu pawh ni se an dem tih sawiin, ‘ram dinhmun a tiderthawng’ niin a sawi.
Lebanese Army chuan rocket-te hi al-Qulaila leh ramri khua, Tyre bul, Maaliya leh Zibqine atanga kah niin a sawi.
Thlalak a tihchhuahah rocket kahna leh la kah loh tam tak sipaiten al-Qulaila, Zibqine leh khawchhak lam lehzual, Marjayoun bula an hmuh chhuah a tar lang.