Manchester United chuan a sang pali zinga kir leh turin hnehna an chang a. Brentford lakah an rinrawl Marcus Rashford bawkin goal khungin 1-0 in an chak.
Nilaini zana Old Trafford a Premier League inkhelah England forward hian tun season a a goal 28-na a khung a. Hei hi chakna goal niin Brentford hian an sut thei lo.
Newcastle United laka an tlawm hnuah United in season tharah UEFA Champions League khelh an inbeisei dawn chuan chak a pawimawh tih an hria. Chutihrualin Brentford pawh Europe huap inelna khelh tum ve tho an ni a. United laka an tlawm hi tunhnai Premier League match hnuhnung 17 atanga vawi hnih an tlawmna chauh a ni.
Inkhelah erawh mikhual team zawk an nihna a lang. First half-ah nidang an football hlauhawm khelh thin ang an khel lo. Second half-ah erawh an danglam a, nimahsela United goal-ah an khung thei lo.
United tan Scott McTominay leh Antony ten goal an khung teuh viau hnuah minute 27-naah Rashford-a’n a khung a. Marcel Sabitzer ball tauh let sak chu tihsual nei miah lovin a pet lut.
Rashford hian Premier League-ah tun season-ah goal 15 a khung tawh.
Second half tawp lamah United goalkeeper David de Gea chuan substitute Kevin Schade lakah a team a chhanhim a, hei hi Bees chance neih that ber a ni.
United manager Erik ten Hag chuan hnehna chang mahse hma an sawn a ngai a, Rashford-a goal khungah an innghat leh lutuk niin a ngai.
“Chak turin Rashford-a goal khung hi kan mamawh tih hi phat theih a ni lo. Chutihrualin player dang goal khung thei tak tak kan nei. A hunah an chet ve a ngai.”
“Second half-ah goal kan khung tawh loh avangin inkhel a hautak a, mahse kan tan chuan hnehna pawimawh a ni.” tiin a sawi.
Magpies chak chiang
Pathumna a awm Newcastle United in an chetthat chhunzawmin West Ham United lakah goal nga an khung a. London-ah 5-1 in hnehna an chang.
Magpies hi UEFA Champions League khelhphak ngei tum an ni a, tun season-ah league a team hneh har ber zing ami an ni a. Tunhnaiah goal khung lamah hma an sawn viau bawk.
Callum Wilson leh Joelinton ten minute 6-na leh 13-naah goal an khung a. Hammers defender Nayef Aguerd leh Lukasz Fabianski te chetsual avangin Wilson leh Alexader Isak ten goal khung belh ve lehin Joelinton bawkin huntawp dawnah goal hnuhnung a khung a. Hammers goal khat hi Kurt Zouma khung a ni.
Newcastle manager Eddie Howe chuan, “World Cup zawhah kan hriam lo viau a, mahse zaninah engkim a inthlak. Duhthusam ni lo mahsela zaninah kan huntha neih kan hlah mang lo.” tiin a sawi.