Aizawla Assam Rifles awmna ram chhunga LSC nei zingah sorkara pe let an awm belh zel a, mi 10-in LSC an kir tawh.
The Zozam Times zawhna chhangin Land Revenue & Settlement department hotute chuan tun hnaiah sipai ram luah chhunga LSC nei mi pahnihin an LSC-te department hnenah an pe kir a, hengte nen hian LSC kir tawh chu an vaiin mi 10 an tlin tawh thu an sawi.
Revenue department chuan tun hnai khan Assam Rifles luah chin ram chhunga ram neite chu an LSC cancel a nih loh chhan tur sawifiah turin hriattirna a lo pe a, hemi bawhzui hian ram neitu thenkhat chuan an insawifiahna department hnenah an thehlut tawh.
Hemi chungchang zawhna chhangin revenue department hotute chuan, “Tawngkaa rawn insawifiahte an awm a, ziak pawhin kan dawng tawh,” an ti a; ni 30 chhung hun an pe a, an hunbi tiam a ral hunah an insawifiahnate chu an endik dawn tih an sawi.
Tar lan tawh thin angin revenue department chuan sipai luah chin ram chhungah Mizo District Land Revenue Act, 1956 Section 8-na tlawhchhanin mi malin ram neih theih a ni lo va, Mizoram (Restriction on Use of Transferred Land) Act, 2002 hmangin ram neih chu a khap bawk tih an lo sawi tawh a ni.
Sipai awmna hmun hrang hrangah mi hrang hrangin ram an nei a, lammual ramah mi 54-in LSC an nei a, Assam Rifles Commandant bangla ramah mi paliin, McDonald Hill-a Assam Rifles ramah mi pathumin an nei bawk a, a vaiin LSC 61 a ni a, chung zingah chuan LSC pe kir mi 10 awm tawhin sipai luah ram, hmun thumah mi 51-in LSC an nei mek a ni.
Mizoram sorkara Council of Minister, March 8, 2019-a thutkhawm chuan sipai luah rama dan lova LSC pekte chu thiah an lo rel tawh a. Central YMA pawhin sipai chhuahsan tur ram mi mal kuta a luh chu rem ti lovin LSC neitute chu sorkarah kir turin an lo ngen tawh thin a; hemi chungchangah hian kum 2020 khan Gauhati High Court-ah Public Interest Litigation (PIL) an lo thehlut tawh.