Aam Aadmi party (AAP) Mizoram hnuaia zirlai pawl, Chhatra Yuva Sangharsh Samiti (CYSS) chuan Mizoram sorkarin a enkawl zirna sikulte a that tawk loh avang harsatna awmte sukiang tur leh zirlai harsatna tawkte tan hmalak an tum thu an sawi.
Inrinni khan Aizawl Press Club-ah thu thar thehdarhtute kawmin, March 16, 2023 khan CYSS din a nih thu an sawi a. Mizoram sorkarin a enkawl sikulte a that tawh loh avangin private sikul a tam phah a, chu chuan thingtlang leh khawpuiah nu leh pate tan harsatna nasa tak a thlen phah niin an sawi.
“Keini zirlaite hian zirlaite hamthatna – heng scholarship a hun taka lak theih loh te, zirna in tha lo te, zirna hmanrua tha lo leh zirtirtu indaih lo leh tha tawk lote kan tawrh phah a, hetiang a ni chung hian a siam tha turin sorkarin hma a la duh lo a. Zirna kawngah zirlaiten harsatna hrang hrang an tawhte sukiang turin AAP Mizoramten zirlai pawl, CYSS hi kan din a ni,” an ti.
India khawpui ber Delhi AAP sorkarah chuan sorkar sikulin nasa takin hma a sawn a. Zirlaite pawhin mi mal sikul ai chuan sorkar sikula luh an thlang ta zawk hial nia sawiin, “AAP sorkarna hnuaiah hmasawnna nasa tak kan hmuhte hi keini zirlaite hian kan awt a, kan ramah pawh hetiang hi kan thlen tir thei a ni,” an ti bawk.