Aizawl: Electric Veng YMA thlanmual thar panna tur lei dawh chu Inrinni khan Aizawl North III bialtu MLA C Lalmuanpuia’n a hawng.
Lei dawh thar hi Electric Veng thlanmual hlui atanga thlanmual thar ri-na kawr kâna dawh a ni a, UD&PA department sum Rs. nuai 30 senga dawh a ni.
Ni 80 chhunga dawh zawh a ni a. Feet 74-a thui, feet 15-a zau niin a chhuat pawh inchi sariha chhaha chhun a ni a, ban phunnaah lung nghet taka rem a ni bawk.
Lei thar hawnna inkhawm hi Electric Veng YMA President C Lalrokhuma’n a kaihruai a, lei thar dawhna tura sum ruahmansaktu UD&PA department, an veng pa Lalchamliana, Home Minister, bialtu MLA C Lalmuanpuia leh an venga tlawmngai pawl hrang hrang, local council leh political party te chungah lawmthu a sawi.
A hawngtu, bialtu MLA chuan Electric Vengin thlanmual thar panna lei tha taka an dawh a hawng thei chu lawmawm a tih thu a sawi a, lei dawhna tura sum ruahman a tam lo chunga khawtlangin tha taka an dawh thei chu fakawm tiin, tlawmngai pawl, local council leh political party te tanrualna lawmawm a tih thu a sawi.