Aizawl : Northeast initiative development agency (NEIDA)-in nimin khan NABARD bultum Tribal development fund (TDF5) hnuaia Khawbung RD block huam chhunga Apple chingtu, Tuipuiral Apple growers co-operative society ltd. member-te tan Champhai-ah Co-operative society inenkawl dan, ‘Co-operative society management’ chungchang zirtirna hun an buatsaih.
Co-operative Audit officer C. Vanlalhruaia’n Co-operative society-te inrelbawl dan tur leh kuthnathawktute tharchhuah tihralna thlenga a pawimawh dan te a sawifiah a. District development manager, NABARD H. Lalhmachhuani’n NABARD hnuaia FPO te tana hamthatna dawn theih hrang hrangte a sawi bawk.
Sorkar thuchhuahin a tarlan danin NEIDA-in kum 2020 atang khan Tata trusts leh Development finance institution hrang hrang te kaltlangin Champhai district-a loneitu leh miretheite chawikan hna an thawk tan a. Tata trusts bultum Integrated livelihood promotion (ILP) hnuaiah Khawbung RD block-a khaw 6-a loneitu 352 te tan Vaimim leh Chana chin hna an kalpui tawh a; he project-ah hian AH&Vety. department nen tangkawpin loneitute thar chhuah Vaimim quintal 612, Rs. nuai 12 man an leisak a ni.
NEIDA hian Cha- mphai leh Khawzawl district-a khaw 41 tan Springshed management hna an thawk dawn bawk tih sorkar thuchhuah chuan a tarlang a. He project kaltlang hian tuihna chak tawh lo leh kangchat tawh te tihnun thar leh na turin groundwater rech- arge hna an thawk ang.
NABARD nena thawhhona Farm sector promotion fund (FSPF) hnuaiah Ruantlanga loneitute tan Zik- hlum leh Chana chin hna pawh an buaipui a, Horticulture department nen an thawkho mek a. Heng bakah hian NABARD project hnuaiah Tribal development fund (TDF6) hnuaiah Khawzawl district-a khaw pali ah Dragon Fruit chin hna kalpui turin hma an la dawn bawk tih sorkar thuchhuah chuan a talang a. NEIDA hian hma an lakna hmunahte thlai tui pek tur an hnianghnar zawk nan Diversion based irrigation hmangin tuilakna turte an buaipui sak thin tih a tarlang bawk.
Khawbung RD block huam chhunga Apple chingtute hi NEIDA leh NABARD tanpuinain Central sector scheme 10,000 FPO hnuaiah Tuipuiral Apple growers co-operative society limited tia ziahluh an ni.