India ram hmun tam zawkah tun hnai ni reilo te chhunga COVID-19 kai hmuh chhuah an pung leh mek a, state eng emaw zat chuan hmai tuam chu tih ngei ngei tur tiin kaihhruaina an siam thar leh ta a, thenkhatin inveng turin mipuite an hriattir bawk.
Union Health Minister Mansukh Mandaviya chuan kar hmasa tawp lamah khan Covid darh thar leh mekah hian state tin hotute kawmin hma lak dan turte an sawiho va, hetah hian damdawi in leh thawktute inbuatsaihnate pawh sawi a ni.
Thawhtanni leh Thawhlehni hian ram pumah sorkar leh mi mal damdawi inah lo inbuatsaih lawk nan mock drill neih tura ruahman a ni.
NDTV-in health minister a kawmnaah chuan sorkar chu a inbuatsaih nasa tih a sawi a. ICU khum, oxygen supply leh na khirh zualte enkawlna tur ang chi chu inruahman lawk vek a ni tawh tih a sawi a, kar tin dinhmun thlir leta thutkhawm koh ziah a ni dawn bawk.
India-a Covid leng thawh lina thleng mai theiah hian inralrin a ngai hle tih health minister chuan a sawi.
Tuna India-a kai mek Covid hi Omicron atanga insiam danglama a chi thar peng leh, BF.7 leh XBB1.16 a ni tih Mandaviya chuan a sawi a. Heng hri chi hnih hi ministry chuan a lo tawn tawh a ni tih sawiin chuti taka hlauhawm a ni lo tih a sawi bawk.
Haryana, Kerala leh Puducheery-a vantlang hmuna hmai tuam tura tihna a awm mek lai hian state dang pawhin fimkhurna thil an kalpui thar leh mek bawk.
Uttar Pradesh sorkar chuan thuneitute chu ram dang atanga India-a lut apiangte thlawhna tumhmunah endik zel turin a ti thar leh.
Covid kai hmuh chhuahte reng reng chu eng ang chi ber nge an kai tih hriat theihna tura endik zui (genome sequencing) turin a ti bawk.
Delhi-ah pawh damdawi in, polyclinic leh dispensary tinte chu sample endik titam lehzual theuh turin health department chuan a hriattir.
Ram khawpui berah hian Covid kai an pung leh hret hret zel a, damdawi thiamte chuan a chi thar, XBB.1.16 chuan nasa takin a tidarh leh thei tih an sawi.
Hetih rual hian mipuite chu chiai lo tura ngenin, hri an kai lohna tura dan zamte zawm tha tur leh invenna booster dose la theuh turin an ti bawk.