Rajasthan-ah assembly inthlan a hnai ta hle a, hetih mek lai hian Congress chhungkuaa an hruaitu lawk pahnih, Sachin Pilot leh Chief Minister Ashok Gehlot-a inkara khi lo awm tawh thin chu a chhuak thar leh ta anga ngaih theih thil a awm leh ta.
Kum 45 mi, Pilot-a hian Gehlot-a sorkar chu a hma chiaha Vasundhara Raje-i kaihhruai BJP sorkara ei rukna awmte chhuia action la ngei turin a phut a. A phutna lantir nan hian Thawhlehniah chaw a nghei dawn tih a sawi bawk.
Pilot-a hian kum 2018 inthlan dawna an intiam ang ngeiin Congress sorkar chuan mipuite tan hma a la tur a nih thu a sawi a. Sorkar chu mafia, dan lova thil laih chhuah, ram luah leh Lalit Modi affidavit case-ah a che chhuak lo niin a sawi.
“Thla ruk thla sarih vel hun a la awm a, eptuten thil dik lo an tihte hai chhuah a ngai. Congress worker-ten sawi leh tih inkar a inthlauh dan an ngaihven mek a ni,” a ti.
Pilot-a hian Gehlot-a’n Raje-i ei ru leh dik lo taka ro a rel tia a sawi lai video a play a, “Mahse, engati nge a chhui loh?” a ti a. Congress sorkare chuan BJP sorkar tih dik loh finfiahna an nei a; mahse, engtin mah an ti lo niin a sawi bawk.
“Kan thu tiam tipuitling si lovin inthlan kan hmachhawnthei lo vang. Finfiahna kan nei a, kan che ngei tur a ni a, kan chhui ngei tur a ni. Model Code of Conduct hman a ni tep a, mipuite hnenah chhanna kan la pe lo,” a ti.
Pilot-a hian he a thil sawi chungchangah hi party hruaitute pawh a sawipui fo tih a sawi a; mahse, pakhatah mah chet lak zuina a awm lo niin a sawi a. “Hei hi kan sorkar a ni a, kan chet a ngai. Chu chu mipuiin min rinna tur chu a ni,” a ti.