Rajasthan Royals in Indian Premier League season tharah match thum an khelh atang hmahruaitu ni nghal turin Delhi Capitals an hneh a. Batsman pahnih Yashavi Jaiswal leh Jos Buttler te chetthat an la chhawr chhunzawm.
Inrinni zana Guwahati a Barsapara Cricket Stadium a inkhelah Delhi in an vawm hmasa. Kum 21 mi Indian batsman beiseiawm Jaiswal-a’n four runs vawi nga a zawna vua a bul tanin ball 31 atangin run 60 a siam a. A dinpui Buttler-a’n ball 51 atang run 79 a siam ve bawk.
An innings tawp lamah Shimron Hetmyer chuan run 39 thawh bawkin over 20-ah run 199 an siam a, wicket 4 chiah an hloh.
Delhi tan David Warner chuan run 65 siam mahse Royals bowler Trent Boult chuan run siam lovin Prithvi Shaw leh Manish Pandey te over hmasa berah an wicket a la nghal a. A tawp lama che tha Lalit Yadav vawm out bawkin over 20-ah run 142 chiah an tlin a. Run 57 in Royals an chak.