Mizoram University students council buatsaih MZU Virthli neih mekah nimin khan Cultural Day an hmang a. Art & Culture department Director Carol. VLMS. Dawngkimi’n a hmanpui.
Art & Culture department director chuan ‘hnam dang ten MZU an tlawh thin avang leh hnamdang zirlai tam tak an awm ve avangin MZU-a zirlai ten Mizo nunze mawi leh Mizo nihphung te, hnam incheina te vawnhima, midang hmuh tur leh entawn tura an chhawp chhuah thiam a pawimawh thu a sawi a. Mizo puan te pawh uluk taka enkawla, a nihna ang taka hmang tangkai thin turin Mizo zirlaite a chah.
MZU Virthli Cultural Day-ah hian Mizo hnam lam – Cheraw leh Chheihlam hmanga inelna buatsaih a ni a, MZU-a zirlaite bakah Hrangbana College, T. Romana College leh Aizawl Govt. College atang tein he inelnaah hian an tel. Mizo lam bakah Mizoram state pawn leh Mizoram chhunga hnamdang cheng te anmahni hnam lam te hmangin an inel bawk a, he inelnaah hian hnam hrang 11 an tel bawk.
Mizo lam (Cheraw & Chheihlam)-a inelnaah Govt. Aizawl College chu pakhatna niin, Govt. Hrangbanga College pahnihna an ni a, Economics Dept. MZU pathumna an ni. Hnamdang lama inelnaah Wangala – Meghalaya chu pakhatna niin, Naga War Dance – Nagaland pahnihna niin, Rangdhali – Assam pathumna an ni thung.