SEDP sum Rs. nuai 270 senga sak Tlabung-a Commercial vehicle terminal building chu nimin khan Transport Minister TJ Lalnuntluanga’n a hawng a. Commercial vehicle terminal chu Tlabung leh a chhehvel economy tihhmasawn kawnga hmanraw pawimawh a la nih chhoh a beisei thu a sawi.
Transport Minister chuan Transport department hmalaknain sirkarin Mizorama lui hmanga inkalpawhna changtlung zawk nei tura hmalakna ‘inland water transport project’ lian tham tak ruahman mek a nih thu sawiin, sorkar laipuiin Khawthlangtuipui transport project atan Rs. vaibelchhe 22.90 a sanction fel tawh thu leh tender pawh tihfel tep a nih thu a sawi a. He project kaltlang hian hmasawnna leh hna tam tak a siam tur thu a sawi.
Tuichawng, Darzo – Chhimtuipui-ah Techno feasibility survey zawhfel tawh a nih thu leh Mizoram hmun hrang hrangah Inland water transport liantham taka kalpui zel tum a nih thu Transport Minister chuan a sawi a. Tlabung leh a chhehvel khuate sorkarin a ngaipawimawh takzet nia sawiin, Transport Minister chuan sorkar hmalaknaa hmasawnna thleng mek leh ruahmanna awm mek te a sawi bawk.
West Tuipui bialtu MLA Nihar Kanti Chakma-a’n a bial chhunga hmasawnna ruhrel thar pawimawh tak hawn a nih avanga lawmawm a tih thu a sawi a. Commercial vehicle terminal building chu Tlabung leh a chhehvel khaw mipuite tana hmasawnna tam tak thlentu a nih ngei a beisei thu a sawi bawk a ni.