MNF thalaiin ZPM party-in Larsap hnena Sports Minister Robert Romawia Royte an hekna chungchang dan hre mi ten an zirchianna atangin Sports Minister-in dan a bawhchhe lo niin an sawi.
Nimin khan MNF party thalai hruaitu ten thuthar thehdarhtute kawmin, “Mizo thalai leh infiammite hmasawnna tura nasa taka thawktu Sports Minister Robert Romawia Royte chu ZPM party-in hmu thei lovin kil hrang hrang atanga beihna tur an dap” an ti.
ZPM party chu social media-ah tawngkam chhe tinreng hmanga Sports Minister chirhtheha, thu awmze neilo hmanga Governor-ah te hial hekah MNF thalai chuan an puh a. ECI-in an beisei ang thutlukna a siam dawn lo tih hre lawk ang hrimin mipui rilru hruaikawi nan vawiinah punkhawm buatsaih an tum niin an sawi.
MNF thalai chuan “Sports Minister hmalakna avangin Mizoram sorkar sum eihek lovin infiamna ruhrel tam tak Mizoram hmun hrang hrangah din a ni” tiin, “Tourism sector-ah pawh hmasawnna ruhrel ropui tak tak siamin events ropui tak tak hlawhtling taka neih thin a ni” an ti.
Assembly session zawh takah ZPM MLA ten thu diklo an sawi nasa hle niin MNF thalai chuan an sawi a. ZPM Leader Lalduhoma’n PMJVK-in sports a huam lo nia House-a a sawi pawh thu diklo a nih thu an sawi. ZPM MLA ten Assembly session-a UD&PA Deptt leh Aizawl Smart City sum chhuhsaka sports atana hmanga Sports Minister an puhna pawh thu diklo a nih thu MNF thalai chuan sawi a. Sports Deptt-in UD&PA leh Smart City Projects sum sports atan an pawhpen loh thu sawiin, Central sorkar atanga sum an hmuh an hman zawk niin an sawi.
ZPM MLA Lalchhuanthanga’n Assembly House-ah bawk Futsal game chu ‘medal awmlohna’ ti hialin a sawi nia sawiin, MNF thalai chuan “a hriatna zim zia tilangtuah kan ngai” an ti a. AIFF-in kumtin Futsal National League a kalpui thin thu leh Mizoram team Electric Veng Futsal Club pawh Futsal National League-a an chet that hle thu sawiin, Delhi Futsal Club-ah pawh Mizo player 5 an awm thu an sawi.
ZPM Leader Lalduhoma’n Footballer inhliam Miriam Lalnunsiami inenkawlna sum pe lo anga House-a sorkar a puhna pawh dawt a nih tuh sawiin, December ni 15, 2022-ah Miriam Lalnunsiami inhliam tanpuina sorkarin Rs 25,000 a pek thu leh Mizoram olympic assn-in Rs 10,000 a pek thu an sawi.
Assembly Sessiona-ah bawk ZPM MLA C. Lalsawivunga’n Lunglei Ramthar Futsal ground sak mekah physical progress 1% vel leka a sawi pawh thudiklo a nih thu MNF thalai chuan an sawi a. Ramthar Futsal ground physical progress chu 45% vel niin, Assembly-a zawhna chhannaah chuan tarlan a nih thu an sawi bawk.
MNF thalai chuan ZPM din hnuah Mizoram politics-ah dawta inchirhthehna a lar thar viau nia sawiin, “hei hian Mizo khawtlang nun nuam tak tichhiain, kohhran leh chhungkaw inrelbawlna thlengin nghawng thalo a nei ang tih a hlauhawm hle” an ti bawkl a ni.