School Education leh Labour Employment Skill Development & Entrepreneurship (LESDE) Minister Lalchhandama Ralte-in National Education Policy 2020-in skill development a ngaipawimawh thu sawiin, “school-ah thiam thil zir nan kum khatah ni 10 chu school bag keng lova hun hman tum a ni a, hemi mil hian school calendar pawh siam a ni” a ti.
Adult Education-in model centre hrang hranga eizawnna kawnga thiam thil zirna Ramhlun South leh Chawnpui Veng Model Centre-a an buatsaih kharna hun School Education Directorate conference hall-a an buatsaihah he thu hi Lalchhandama Ralte chuan a sawi a. LESDE-in skill development lama lian taka hma a lak thu sawiin, India ram huap inelnaah Mizo thalai te a titha pawl nia gold medal la te pawh an awm thu leh kum 2024-a World Skill competition-a tel tura Mizo nula/tlangval tirh tuma an inbuatsaih leh mek thu a sawi.
Lalchhandama Ralte chuan Adult Education-in skill development lamah huang an zauh thu leh a hlawhtlinna lo lang lawmawm a tih thu pawh sawiin, zau zawka hma an lak zel a beisei thu a sawi a. Zirchhuakte chu an hlawhtlin leh hlawhtlin loh anmahni kuta a awm tur thu sawiin, teirei peih tur te, taimakna leh tumruhna neia, hmathlir fel tak nei turin a chah bawk.
Adult Education Dy Director Ng. Fanchun-i’n a sawi danin, Adult Education-in eizawnna kawnga thiam thil zirna chu Aizawl-ah Chawnpui leh Ramhlun South model centre bakah Lawngtlai leh Mamit-ah an buatsaih a. Ramhlun South centre-ah mi 34-in an zir a, Chawnpui centre-ah mi 53 in zirin, a zir chhuak chu 47 an ni a. Lawngtlai centre-ah mi 45 in zirin, 39-in an zir chhuak a, Mamit centre-ah 46 in an zir chhuak bawk a ni.