MNF Adviser, Minister of State ni bawk Robert Romawia Royte-in “ZPM party-in MLA atanga bang tura Governor hnena min hekna chu Assembly House-a ZPM Leader Pu Lalduhoma’n dawt a sawi avanga ngaiham min dil vang ni-ah mipuiin an ngai” a ti.
Hachhek biala West Bunghmun khua a tlawhnaah he thu hi nimin khan Robert Romawia Royte chuan a sawi a. ZPM party-in an hek chungchangah thudik a lang chhuak mek nia sawiin, “hun nei tlem tawhah an inngai nge ni vawiinah pawh keima chungchangah Vanapa hall kawtah a vawi 3 nan an kalkhawm leh an ti,” a ti.
Minority Affairs changtu Minister Robert Romawia chuan, Mamit district chu India rama district hnufual zual 124 thlanchhuah zinga a tel avangin hmasawnna tura mumal taka ruahmanna siam a nih chuan sum sanction turin central sorkar pawh a inhawng hle niin a sawi a. Sorlar laipui a inhawng tih chu Sports deptt. leh ICT department-in projects an siam te hmanga Mamit district hmun hrang hranga hmasawnna hna an thawh ten a tichiang niin a sawi.
Robert Romawia Royte chuan ruahmanna thar siam mek a nih thu sawiin, Hachhek bial chu mi taima leh kuthnathawk hlawhtling tamna bial a nih thu leh Kuhva chinga an hlawhtlinna pawh Zoram hmun dang te entawn tlak niin a sawi a. “Langkai balu that zia pawh Zoram mipuiin an hre tawh a, Hachhek bial hi MLA bial hmasawn chak ber ni turin tan kan la dawn a ni,” a ti.
MNF sorkarin Covid hripui karah pawh thil tha tam tak a tih avang leh mipuiin Chief Minister Zoramthanga kaihhruai sorkar thil tih that an hmuh zel avangin Mizoram hmun hrang hrangah MNF zawmtu an pung chak hle niin Robert Romawia chuan a sawi a. Hri leng avanga sum harsatna karah SEDP pawh sem mek a nih thu leh SEDP dawng thar tur pawh thlan a hun leh dawn tawh thu sawiin, SEDP sawiseltu leh hlawhchhampui tur ni lo, a taka hlawhtlin puitu tur thlan thiam a tul thu a sawi bawk.