Assam Police-in Nilaini khan an state-a Aam Admi party (AAP) thupuangtu chu social media-ah state sorkarin Bihu lawmna remchangah hmangin sumdawnna atan a hmang nia a tarlan avangin an man.
Sushant Kumar Nath hi pawl hrang hrang laka inhmelmakna thlen thei thil ti, thu diklo thehdarh leh mi phiarruk thubuai siamsak a a ni a. AAP member-te chu an hruaitu man a nih hnuah hian Guwahati-a Police Station-ah pungkhawmin an hotu chu chhuahtir an phut a. State party unit chuan ‘thubuai phuahchawp’ hmanga man niin an sawi bawk.
Sushant Kumar Natha hian, “Sorkarin Guinness World Record-a lan tumin Bihu chhim tur te tan ticket a hralh,” tiin social media-ah a tarlang a, Guwahati-a kût lawmna tura world record siam tuma hmalakna kal mek chungchang a sawina a ni.
Bihu hi Assamese kumthar a ni a, vawiinah hian a lawmna pui ber chu neih a ni ang.
Guwahati khawpuia Bihu lawmnaah hian sorkar chuan World record siam ngei a tum a, Bihu lâm thiam leh khuangpu 11000 chuang inlantira record siam a tum a ni.
Prime Minister Narendra Modi pawhin he hun hi a hmanpui dawn a, minute 15 vel record siam tur hian hun hman a ni ang.
State sorkar chuan he hun chhim duh mipuite chu a thlawnin luh phalna
a pe zel a ni.