Aizawl khawpui leh khaw dang tam tak chawmtu Tlawng lui zawh chhuaka, a humhalh kawnga hmalak dan tur te zingchiang tura March ni 20, 2023-a thawk chhuak Dawrpui Adventure Club member 4 – Samuel Lalruatliana, Samuel Vanlalhmangaihtluanga, Zothanpuia leh C Vanlalhruaia ten nimin khan an tum hlenin, Bairabi kai an thleng.
Dawrpui Adventure Club member 4 te hi March ni 20, 2023 zingkarah Bialtu MLA, Sports Minister ni bawk Robert Romawia Royte chuan DMC, Pipu Tlang, Dawrpui atangin a vailiam a, a tuk March ni 21-ah ruahsur avangin an chawl a, March ni 22, 2023 atangin Zobawk chhak lam KM 2 vela hlaa awm Tlawng hnar, Sairep atanga zawh tanin, harsatna lian tham tawk lovin nimin khan tluang takin Bairabi kai an thleng a ni.
Tlawng dung zawh chhuaktute hi Dawrpui Local Council Chairman Zosangzuali hovin khawtlang hruaitu dang te leh Dawrpui Adventure Club member ten Bairabi kai-ah an lo hmuak a. Nizan khan Dawrpui School Complex-ah Dawrpui Local Council kaihhruaiin anmahni lawmna hun buatsaih nghal niin, NGO hrang hrang te bakah Sports & Youth Services department-a Adventure Wing ten lawmpuina thilpek an hlan.
Dawrpui Adventure Club Member, Tlawng dung zawhchhuaktute chuan harsatna liantham an tawh loh thu leh an paltlang khaw tam tak atanga kawng hrang hranga puihna leh thilpek an dawn nasat thu sawiin, an lawmzia an sawi uar hle a, Sangha rep thlenga lo paitu an tawng niin an sawi a. Dawrpui veng mi bakah hmun hrang hrang atangin tawngtaipuina pawh an dawng nasa hle niin an sawi.
Aizawl East-II bialtu MLA, Sport Minister ni bawk Robert Romawia Royte-in Rs 5,75,000 laia a tanpui bakah, an tum an hlen hnu ah an pali-a Rs 10,000 theuh lawmpui nan a pek avanga an lawmthu an sawi a. MNF, Dawrpui Unit-in Rs. 10,000 an pai bakah khawtlang mi inphalte atanga kawng hrang hranga tanpuina an dawn avang pawhin lawmthu an sawi. Dawrpui Local Council, YMA, MUP leh MHIP ten an thlawp tha hle tih sawiin, an mamawh ang apiang ngaihtuahsaka kawng htang hranga an puihnaah lawmthu an sawi bawk.
Tlawng lui hi April 19 – May 5, 2022 chhung khan Romalsawma (Roma), Mission Vengthlang, Aizawl chuan Adventure club pathum – Mission Vengthlang Adventure club, Zotrek Adventure Club leh East India Campers Adventure Club te tawiawmna leh vilna hnuaiah ‘Save Tlawng Lui’ project kalpuiin a lo zawh chhuak tawh bawk a ni.