India ramah Covid-19 darh thar leh mek chuan ziaawm lam a la pan lo zel a, ni li chhung a zawnin a kai hmuh thar chuan 10,000 a la hawlh ziah.
Darkar 24 liam ta chhung pawh khan mi 10,093-in Covid hi an kai tih hmuh chhuah leh hman a ni a; mahse, a hma nia mi 10,747 hmuh ai chuan 6% velin an tlem zawk.
Hri kai enkawl lai pawh an pung hret hret zel a, mi 57,542 awm mekin darkar 24 liam ta chhung hian mi 19-in an thihpui hman bawk.
Darkar 24 liam ta chhunga sample endik zinga 5.61% chuan hri an kai tih finfiah a ni a, hei hi a san em avangin hri hi la darh zel thei a ni.
Chawlhkar hnih liam ta vel atanga hri kai hmuh an pun leh tan avang hian state tam tak chuan ngaihtuahna thar sengin an damdawi inte chu nasa taka darh leh theia an inpeih em tihte an enlawk a, ram pumah mock drill neih a ni tawh bawk.
Hetih lai hian sorkar laipui chuan hri darh thar leh mek hi ram pum dap ni lovin a darhna lai hmun bik awm, endemic a la ni tih an sawi a, ni 10-12 vel chhung chu a kai hmuh pawh an pun a la rinawm thu an sawi a, tunah rih chuan hlauhthawn tur a awm lo tih an sawi bawk.
Union health ministry chuan hri kai hmuh hi pung leh deuh mah se damdawi in luh ngai khawp ang chi an tam chuang lo niin a sawi.