Bangladesh High Commissioner to India Mustafizur Rahman chuan Tripura-a Maitri Setu a tlawh dawn.
Rahman-a’n hmarchhak state a tlawh tur thu hi Zirtawpni khan LPAI Manager Debasish Nandi chuan a sawi a ni.
Bangladesh High Commissioner Rahman-a hi Land Ports Authority of India (LPAI) Chairman Aditya Mishra-a’n a tawiawm bawk ang.
Maitri Setu hi India Bangladesh Friendship Bridge tiin an sawi thin bawk a, km 1.9-a thui lei, Feni lui chunga dawh, Sabroom, South Tripura leh Ramgarh, Bangladesh inkalpawhna a ni.
“Sabroom-a lawngchawlhna tur siam hna pawh chak taka kalpui a ni a, hna 80% thawh zawh tawh a ni,” tiin LPAI Chairman Mishra chuan a sawi.
“Cargo terminal siam hna pawh 60% chuang thawh zawh tawh niin hei hian mihring leh bungraw veivak a tiawlsam em em dawn a ni,” a ti.
Maitri Setu hi Tripura leh Chittagong lawngchawlhna, Bangladesh inpawh thei tur niin India-a khawchhak leh khawthlang lam state-te Assam kaltlanga hnai leh hun duh rei lo zawka an inkalpawh theihna tur a ni.
Lei hmang hian khawmual atang chauhva tlawhpawh theih, India hmarchhak chu tuipui atangin a pawh thei ve tawh dawn tihna a ni ta a. Bangladesh tan pawh khawl lian leh ritsak tak takte chu India hmarchhak atangin awlsam zawk. lawng hmangin a lak luh theih tawh dawn tihna a ni ve bawk.
Lei hming atana ‘Maitri Setu’ tia vuah hian India leh Bangladesh inthian thatna leh inkungkaihna thang zel a entir a ni.