Inrinni khan Leitan South Presbyterian Kohhran chuan an kum 25-na, Silver Jubilee lawmna pualin veng chhung thenfai hnatlangpui an nei.
Upa bial hrang hrang pakuate an bial theuhah hnatlang a, hnatlang hian vengah chhung kawng, vantlang hmun pawimawh leh tuiluankawr thenfai hna thawkin mi 200 chuang an thawk chhuak.
Leitan South Kohhran hian veng chhung inkalpawhna kawng leh step siam hnate an thawk thin a. An veng chhung inkalpawhna kawng leh step tam tak hi an kohhran kutchhuak a nih bakah Leitan South Kohhran hian Mizote pian pun a pawimawhzia kalpuiin an kohhran huam chhunga nau piang tharte tangka faiin nau an en thin bawk.
Leitan South Kohhran hi May 24, 1998 khan Leitan Kohhran atangin an indang a. Kumin May 24 khian an kohhran kum 25-na an lawm dawn a ni.