Aizawl: Kolasib leh Mamit district-a oil plam chingtuten a rah hralhna atangin Rs. nuai 700 chuang an la lut.
Kolasib leh Mamit district-ah hian kum 2005 vel atangin Godrej Agrovet Ltd enkawlna hnuaiah oilpalm chin tan a ni a. Tun dinhmunah heng district pahniha a chingtute hi chhungkaw 1,000 chuang an ni a, a taka thar chhuak mek chu chhungkaw 600 vel an ni.
Heng oilpalm thartu kuthnathawktute hian kum tin oil palm atangin sum an la lut mek a, nikum 2022-23 chhung khan a rah (FFB) quintal 57,360 tharin a hralhna atangin Rs 705,52,800 an lei chhuak.
Oil palm thar chhuahte hi farmer-te chuan an huan atanga collection hnai berah dahin Godrej Agrovet Ltd-a thawktuten an buksak bakah Bukvanneia oil palm mill-ah her turin an dahsak zel bawk.
Sorkar laipuiin oil palm beihpui thlakin NMEOOP scheme a kalpui mek avangin oil palm rah, FFB man hi edible oil market rate-ah a innghah avangin kg khat Rs. 10 aiin a hniam ngai lo va, san lam a pan hret hret reng thung.
Hei vang hian Kolasib leh Mamit district-a oilpalm ching mekte chuan oil palm huan zauh belh turin hma an la a, la ching ve lo kuthnathawktu tam takin a huan siam turin thuneitute hnenah an inziak lut mek a, a tiak phun tura nursery siamtu, Godrej Agovet hotu te sawi danin a tiak demand pawh a sang hle a, tun dinhmunah Mamit district-ah phei chuan nursery-a a tiak an neihin a daih dawn lo niin an sawi.