Premier League champion Manchester City in hnehna chang zawnin hmalam an pan a, tlak hlauhawm a awm Leicester City lakah first half-ah goal thum khungin 3-1 in hnehna an chang.
Manchester City hian Etihad Stadium-ah an mikhualte hi first half-ah an ngam viau a. Arsenal hmahruaina chu point thumah tihniam lailawkin an striker Erling Haaland chuan goal a khung chhunzawm zel.
Pep Guardiola pawlte hian a tir minute 13 chhungin goal hnih an khung hman a. Goal hlauhawm an siam zeuh zeuh hnuah minute 5-naah John Stones chuan an goal hmahruai a hlap lut mawi.
Kum 22 mi Norwegian striker Haaland inlar chhunzawmin minute 12-naah penalty atangin an goal hnihna a khung a. Minute 25-naah a ‘finishing’ turu zia lantirin Kevin de Bruyne ball pek chu goal-ah a khung.
Foxes tan goalkeeper Daniel Iversen a che chhe lova, goal thum chhuah mahse Riyad Mahrez goal khung tur a dansak tha hle.
Second half-ah Dean Smith hnuaia a vawikhatna atana inkhel Foxes in minute 75-naah City striker hlui Kelechi Iheanacho hmangin goal khat an khung.
City an kal zel
Premier League champion tum a kal Man City in Arsenal umna boruak an chhem nung a, league intlansiakna hun pawimawh lai takin a zawnin vawi 10 an chakna chiah a ni tawh.
UEFA Champions League leh FA Cup semi-final khelh hmabak la nei mahse tha thlah lovin an tang tih a hriat.
April 26-ah Arsenal nen an inhmachhawn dawn a, anmahni mualah a ni ang. Hei hi manager Pep Guardiola chuan an tan final an tluk inkhel a nih tur thu a sawi.
“Ka sawi tawh angin kan tih ngai chu chak a ni a, kan chak chhoh char char hi a ngai tawh.”
“Tun season-ah an che tha a, an kaltluang hle. Point an hloh hnem vak ka ring lova, chuvangin anmahni hnaih tur hian keini pawh kan chet that mar ve a pawimawh dawn.” Spanish coach chuan a ti.
Tlawm zan
Inrinni zan inkhelah a sang pali inchuhna a tel Newcastle United leh Tottenham Hotspur te an tlawm a. Season harsa hmang mek Chelsea pawh an tlawm leh tawh.
Aston Villa in Villa Park-ah Newcastle an mikhual a, tun season a league a defence nei tha team an lo hre ve lo.
Jacob Ramsey hmanga goal hmahruai an khung hnuah second half-ah tunlaia che tha Ollie Watkins bawkin goal hnih a khung a. Villa hian goal khat offside vanga pawm loh an nei bawk.
Unai Emery pawlte hi a zawnin vawi nga hnehna an chang tawh a. A sang pali a awmte an hnaih ve mek.
Tottenham tan top four beiseina a tlem leh hret a. Tlak hlauhawm a awm pha AFC Bournemouth lakah huntawp dawnah goal chhuahin 3-2 in an tlawm.
Tottenham Hotspur Stadium-ah Gary O’Neil-a pawlten dinhmun him lam an pan hret a. An substitute Dango Ouattara chuan minute 95-naah chakna goal a khung.
Spurs tan Son Heung-min chuan first half-ah goal khung hmasa mahse Uruguay left-back Matias Vina chuan Cherries tana Premier League a a inkhelh hmasak berah goal a khung.
Cherries hian second half-ah Dominic Solanke hmanga hma hruaiin minute 88-naah an forward hlui Arnaut Danjuma chuan Spurs si phurh a sut a. Spurs in Richarlison hmanga hmahruai theih hun an neih hnu lawkah lehlamah Ouattara zawkin goal a khung.
Frank Lampard-a hnuaiah Chelsea an la chak thei lova, Stamford Bridge-ah Brighton & Hove Albion mikhualin 2-1 in an tlawm.
Brighton tan substitute Danny Welbeck leh Paraguay rawlthar Julio Enciso ten goal an khung a. League-ah pasarihna an la ni mek.
Chelsea tan midfielder Conor Gallagher chuan first half-ah goal a khung a, a zawna match li chhunga Chelsea goal hmasa ber a khung a ni.