MNF thalai President Dr L Thangmawia’n Siaha MLA biala an party candidate atan MADC-a MDC ni lai, HC. Lalmalsawma Zasai an hauh thu leh a tlin ngei pawh an rin thu a sawi.
Mara Autonomous District Council (MADC) huam chhunga VC inthlan, April 18-a neih tur atana campaign-a kal MNF thalai president chuan Inrinni tuk khan Siaha Bazar trafic point-a vantlang inkhawmah he thu hi a sawi a. Mizoramah MNF bawk a sorkar leh ngei ang tih chu khawtlanga parawnte leh mipui tam zawk ngaihdan leh hmuh dan nia sawiin, Siaha mipuiten minister an nei leh ngei ang a rin thu a sawi bawk.
Eng emaw thil hriatthiam loh palh avanga lungawi lova MNF party chhuahsante pawh an awm tih an hriat thu sawiin, ram leh hnam siam tha tur leh tihmasawn tura MNF-ah kir leh vek turin a sawm a. VC inthlan lo awm turah pawh khaw tinah Mizoram sorkara a fawng vuan mektu, MNF lo thlang tling vek tura a duh thu a sawi.
Lunglei Municipal Council (LMC) inthlanah ZPM-in hnehna an chang vek kha MNF sorkar tan darthlalang tha tak nia sawiin, L Thangmawia chuan, “LMC inthlana MNF kan tlak vek chhanah khan Lunglei mipuite kan dem reng reng lo,” a ti a. “MNF tling lo mah ila kan puten ensan an tum reng reng lo va, chhim lam hi a hma aia nasa zawka enkawl an tum zawk a ni,” a ti bawk.