Indian politician thin, mi ruk bo avanga thiam loh chantir tawh chu TV-a miin live-a an kawm laiin a unaupa nen kah hlum an ni.
Atiq Ahmed-a hi police-in an kalpui lai niin chanchinbumiten an lo biak laiin Prayagraj, tun hmaa Allahabad an tih thinah a lu-ah kah a ni.
Inrinni zana inkahna a thlen hnuah hian chanchinbumi anga inlana amah kaptu mi pathum chu thuneitute hnenah an inpe nghal.
Ahmed-a hi a hma ni lawkin a fapa pawh police-in an lo kap hlum tawh.
Kum 20 vel liam ta chhungin Ahmed-a lakah hian thubuai chi hrang hrang – mi ruk bo, tualthah leh mi thil chhuhsak leh a dang dang siam a ni a. March thla khan mi ruk bo thubuaiah tual chhung court chuan amah leh mi dang pahnih chu dam chhung lung in tang turin a hrem.
Ahmed-a hian a hmain police-in thah an tum niin a lo sawi tawh.
Video-a a lan dan chuan a unaupa, Ashraf-a nen an kut phuar chungin damdawi inah inentir turin police-in an hruai chu chanchinbumiten an lo tiding a, kah an ni ta a ni.
Social media leh TV channel-a video thehdarhah chuan Ahmed-a hi a fapa vuinaah a kal dawn em tih zawh a ni tih a lang.
Camera-a a thu sawi hnuhnung ber chu, “Min hruai dawn lo va, ka kal dawn lo tihna a ni,” tih a ni.
A kaptu mi pathumte hi motorcycle-a he hmun pan hi an nih thu police chuan an sawi a. Police leh chanchinbumi pakhat ve vein hliam an tuar bawk.
Inrinni zana thil a thlen hnuah hian Chief Minister Yogi Adityanath chuan chhui chianna tur thu pe nghalin Uttar Pradesh-a district enge maw zatah pun khawm khap nghal a ni.
Mi thiamte chuan chanchinbumi leh police awm lai renga inthahna a thleng thei chu mak an ti hle.