Aizawl : Formasa India Foundation-in Serchhip leh Aizawl district huamchhunga YMA branch thenkhatte leh Ngentiang PHC leh Chhingchhip PHC hnenah Oxygen Concentrator an hlan a. Thilpek inhlanna hun Dinthar YMA Hall, Aizawla neih hi Social Welfare Minister Er. Lalrinawma’n a telpui.
Minister Er. Lalrinawma chuan mihring nunna chhan nan Oxygen concentrator a pawimawh hle tih sawiin, “to tham tak a nih avangin lei mai te a awlsam lova, Formosa Foundation ten a mamawhtute tan a thlawna an sem hi a lawmawm hle a ni” a ti.
Hriselna pawimawh zia sawiin, Minister chuan ei leh in fimkhura, mahni taksa tha taka enkawl turin mipuite a chah a. Mizo hnam tlem te zingah mipate an thi nasa chu a vei thu sawiin, “kan nunna pawt tawi thei thil thalo lakah kan fihlim a ngai” tiin zuk leh hmuam, zu leh ruihtheihthil laka insum turin a chah.
Er. Lalrinawma chuan YMA branch hrang hrang te hnena hlan tak Oxygen concentrator chu khawtlang mipui a mamawhtute tan malsawmna a nih ngei a beisei thu a sawi a. Hman ngai lo tur khawpa hriselna tha nei tur erawh chuan a duhsak thu a sawi bawk.
Oxygen concentrator dawngtu branch YMA te hi – Darlawng, Tlungvel Field Veng, Tlungvel Venghlun, Tlungvel Gate Veng, Phulmawi, Khumtung, Baktawng Joint YMA, Chhuanthar, Chhingchhip, Chhiahtlang Hmar Veng, Chhiahtlang Kawn Veng, Sialhau, Thentlang, Khawbel, Lungpho, Rullam, Ngentiang, Thinglian, Hmuntha, Hualtu, Bukpui, Mualpui te an ni.