ZPM Leader Lalduhoma chuan sorkarna an chang a nih chuan a bul tan chawp leh zawn chawp ngai lo turin thlai thar hralhna man mumal takin an duang dawn nia sawiin, hemi tana foreign company dawr turte pawh bepawp lawk turin mawhphurhna an inpe tawh niin a sawi.
Vairengteh ZPM Serlui Joint Block Conference chu Inrinni khan neih a ni a. He hun hmanpuitu ZPM leader hian tunah hian market study team an dinte chuan thlai thar, a bikin sawhthing, aieng, hmarcha leh hmunphiah rate mumal takin an duang dawn a, Pathian zara sorkarna an chan huna a bul tan chawp leh zawn chawp ngai lo turin India ram mai ni lo, foreign company an dawr turte pawh lo bepawp lawk vek turin mawhphurhna an inpe tawh a, hma chak taka hma an la mek a. An inpeih hunah a rate an puang dawn tih a sawi.
Chhungkaw tin hian eizawnna kawngah kal duhna kawng an nei theuh tih sawiin Lalduhoma hian, “Bultanna kan neih loh avanga eizawnna ngelnghet nei thei lo hi chhungkaw tam tak kan awm a ni. Chungho tan chuan bâna kaih policy kan duang ta a, chhungkaw tinte kan duhzawng trade leh project-ah a bul tanna kan nei loh avanga kan thlir liam mai mai a awm tawh lohna turin puih tlak chu kan pui ang a, loan thlengin kan ngaihtuahpui dawn a ni,” a ti.
Serlui North Block President B Sangluaia kaihhruai inkhawmah hian Vanlalsailova pawhin thu a sawi.
ZPM thuchhuahin a tar lan danin, he hunah hian ZPM leader hian an party-ah mi thar 1,717 a lawm lut a ni.