US-a Alabama state-a kum 16 tlin lawmna party-a inpawngkahna thlengah mi pali vel an thi.
Inrinni (India-a Pathianni) zana Dadeville khawpuia Mahogany Masterpiece Dance Studio chhunga silai hmeh puahah hian mi 28-in hliam an tuar a, thenkhat phei chu an na hle.
Tual chhung chanchinbute chuan high school senior, infiam mi, Phil Dowdell-a pawh thi zingah a tel tih an sawi.
President Joe Biden chuan he thil thlen hnuah hian silai khuahkhirhna dan chu kenkawh a ngai tak zet tih a sawi thar leh.
“Kan rama naupangte hi engtikah nge hlauhna nei lova piancham lawmnaah an kal ang?” tiin Pathiannia White House-in thu a chhuahah a tar lang.
US-ah hian kuminah ringawt inpawngkahna hi vawi 160 chuang a thleng ta a, hei hi Gun Violence Archive-in inkahnaa mi pali leh a aia tam kah fuh an nihna a chhinchhiah chin a ni.
Mi 3,200 chuang awrh chauh chenna, thingtlang khawpui tenau tak, Dadeville-ah hian hetiang tharum thawhna hi a la thleng ngai lo.
Inkahna hi engtiang takin nge a thlen leh a hmet puaktu nia rin hi a thi tel em tih pawh hriat theih a la ni lo.
State law enforcement agency-a mi, Sgt Jeremy Burkett chuan chhui a la ngai thui dawn tih a sawi.
“Kimchang takin kan dap a, a nihna dik tak hai chhuakin a tuartu chhungte tan dikna hlen chhuah ngei a ni ang,” tiin Pathianni zan khan a sawi.
Hliam tuarte chu thenkhat ‘na tak’ an nih laiin ‘hliam tenau deuh’ pawh an awm thu a sawi.
Thite hi tleirawl vek nia ngaih an ni a. Inkahna a thlen atanga darkar 12 liam hnuah pawh nu leh pa thenkhat chuan an fate chin an la ngaihven zui.
Dance studio hi khar leh tlawh pawh theih a la ni rih lo.
Alabama hi US state zinga mi chengten silai an neih theihna zalen ber pakhat a ni a, Republican Governor Kay Ive chuan tawrhpuina thu sawi mah se mi tam tak chuan social media-ah silai dan siam that a tul thuin an sawi zui hnan nasa hle.