Aizawl: US Consul General, Kolkata, Pavek-i hian Alora – Center for Well-Being, Govt Aizawl West College chu nimin khan a tlawh.
Pavek leh amah tawiawmtute hi Prof C. Lalthlengliana, Principal, Govt Aizawl West College chuan lo dawngsawng a. Alora Center Volunteer, college zirlaite kaihhruaiin Pavek-i chu center ruahman dan leh an kalpui dan te, an hmachhawp te an sawi pui a. Ani pawhin hetiang hun a hmang thei chu lawmawm a tih thu a sawi a, thil thar leh hmun dangah pawh tih zel tlak an ruahman thei chu lawmawm a tiin a buatsaihtute fakawm a tih thu a sawi.
US Consul General hi amah tawiawmtute bakah CDC, India lam hotute, PATH hotute leh MSACS hotuten an tawiawm a. Sangchin Chinzah, Director, H&TE Dept chuan telpuiin thu a sawi bawk.
Alora Center hi GAWC leh SHALOM Society te hmalakna a din a ni a. PEPFAR, USA fund atanga tanpuina lo kal, CDC, USA kaltlanga PATH-in India hmarchhaka an hmalakna Project Sunshine hnuaiah tleirawlte zinga hmalakna tura ruahman a ni.
He center hi college zirlaite bakah a bul hnai veng thalaite hman tangkai theih tura ruahman leh buatsaih a ni a. Counseling leh health services pe thei tura duan a ni.