Premier League champion tuma intlansiakna boruak a ‘hot’ belh a. Hmahruaitu Arsenal in point hnih hlohin a zawna match hnih nan goal hnih a hma an hruaina an hum zo lo. West Ham United nen inkhelin 2-2 in an inhnehtawk.
London Stadium ah Arsenal in first half tan tir lamah mualneitu lam tlarhnung nawi chu remchangah an la a. Gabriel Jesus leh Martin Odegaard te hmangin goal an khung.
Goal thumna khung thei dinhmunah ding mahse Bukayo Saka chuan penalty a pet goal lova. Hemi hnu lawk hian Hammers in an si phurh sutna khung ta zawkin a tawpah David Moyes-a pawlten chakna goal an khung teuh zawk.
‘Pressure’ a na em ni?
Kar hmasa Pathianni khan Mikel Arteta pawlten Anfield-ah goal hnih a hma an hruai tawh hnuah goal hnih an chhuah. Point hnih an hloh.
Tun tum hi Anfield a ni lova, West Ham hi table mawng lamah, relegation zone hlat lo an nih avangin London Stadium-ah Arsenal tan chak theih a ni.
Bul pawh an tan tha reng a, first half-ah a bikin Hammers tlarhnung inrem hma lutuk chu Arsenal in remchangah an la thiam.
Nimahsela hmahruaitu chungah ‘pressure’ a awm nia ngaih theih tak turin Arsenal an che phelh leh. Defender Gabriel Magalhaes chuan Lucas Paqueta ti tlu in penalty a chawi. Said Benrahma chuan khungin beiseina an nei.
Michail Antonio penalty chawi chu Saka in a khung lo ve bawk a. Hemi hnu lawkah Jarrod Bowen chuan an si phurh a sut.
Mikel Arteta pawlte kar hmasa khan point ruk in Manchester City lakah an sang zawk a, nimahsela Pep Guardiola pawlten ngawrh taka an um mek laiin an inkar chu point li ah a tlahniam a, khelh khatin Arsenal an khel tam zawk. An pahnihin an la inhmachhawn dawn bawk avangin City tan pelh theih an la ni.
Arsenal manager Mikel Arteta chuan, “Bul kan tan tha a, inkhel kan thunun. Goal hnih tha tak kan thun hnuah erawh tihsual kan nei a, chu chu kan inkhelh dan kan chhunzawm lo kha a ni. Goal kan khung belh loh kan tuar.” tiin chak thei an nih thu a sawi.
Pathumnaah United
Manchester United in top four a awm chian tumin ke an pen zel a, pathumnaah inhlangkai in Nottingham Forest 2-0 in an hneh.
The City Ground-ah United tan Brazilian winger Antony a che tha a. Minute 32-naah goal a khung a, second half-ah Diogo Dalot goal khung tur a saimsak leh bawk.
Nottingham Forest in point an hmuh chuan relegation zone chhuahsan tur an ni a, nimahsela mahni mualah kawng engkimah United an chungnung a, set piece atanga hlauhawm an siam bak hlauhawm an nei mumal tam lo.
Antony-a’n Anthony Martial goal shot per atangin goal a khung a. Second half-ah dinglam atang ball lalutin Dalot goal khung tur a siamsak fing hle.
Hnehna an chan avangin United hian point thumin palina a awm Newcastle United lakah hma an hruai a, pangana a awm Tottenham aiin point ruk a sangin khelh khatin an khel tlem zawk bawk.
United manager Erik ten Hag chuan, “Result tha a ni a, kan chak dan a nghet tha viau. A tir atanga a tawp thlengin kan inthlahdah miah loh rah a ni.” a ti a. Hliam an ngah chungchang sawi bawkin, “Kar hmasa khan defender fit pakua ka nei a, tunah pali chiah ka nei. Inelna pathumah kan la awm avangin kan player zawng zawngte kan mamawh vek a ni.” a ti.