Kum hnih liam tawha Covid-19 vanga damdawi ina a thi an tih hnua an vui liam vek tawh, Madhya Pradesh-a Dhar district-a cheng pa pakhat chu an chenna inah a haw leh nawlh mai!
Kamlesh Patidar-a hi kum 35 mi a ni a, Inrinni tuk dar 6:00 vel khan Karodkala khuaa a nutei te inah a lut leh nawlh mai a. Kum hnih kal tawhah khan a chhungte hian an lo vui vek tawh a ni.
Patidar-a hi India rama COVID-19 leng thawh hnihna na takah khan a kai ve a. Damdawi inah dah luh niin a hnuah doctor-ten a thi tih an puang zui a. Damdawi inin ‘a ruang’ hi a chhungte hnenah hlanin a thlahna hun pawh an hmang vek niin a unaupa (cousin), Mukesh Patidar chuan thuthar lakhawmtute a hrilh.
“Hei, tunah a lo haw leh ta mai si a; mahse, khatia a awm loh chhung zawng khan khawiah nge a lo awm tih leh a chungah eng nge thleng a la sawi lo,” a ti.
Kanwan police station in-charge Ram Singh Rathore pawhin a chhungte hnen atanga thu an dawn danin Patidar-a hian kum 2021 khan coronavirus kaiin Vadodara (Gujarat)-a damdawi inah dah luh a ni tih a sawi.
Doctor-te chuan COVID-19 vangin a thi tih an sawi a, damdawi in hian a ruang an hlan let hnuah an khuaah a hun hnuhnung pawh an hmanpui niin a sawi.
Inrinni tuka a nutei a tlawh leh chiah hian a chhungte pawhin a lo la dam reng tih an hre ve chauh a ni tih Rathore-a chuan a sawi.
Patidar-a hri kai leh thih chungchang hi damdawi ina inziakah pawh rinhlelh tur a awm miah lo niin a sawi bawk.