Sorkar chuan hun hman hi ruahmanna fel fai tak hnuaia neih a nih thu sawi mah se eptute an lawm lo hle a. Sorkar chuan mi nunna tiderthawng khawpin a che niin an puh.
Chief minister hlui, Uddhav Thackeray chuan inkhawm huaihawt dan chu ‘ruahmanna fel fai engmah awm lo’ niin a sawi a, chhui chian ngei a phut thu a sawi bawk.
Congress thupuangtu, Atul Londhe Patil pawhin state sorkar chu a fimkhur lovin a inthlahdah niin a sawi a, April thlaa inkhawm buatsaih a nih avangin mi tam tak an thih phah niin a sawi.
Maharashtra Chief Minister Eknath Shinde erwh chuan chhiatna thleng chu ‘a rinphak loh leh a pawi a ti tak zet’ tih a sawi a, thi chhungte hnenah zangnadawmna Rs. 5,00,000 theuh pek an nih tur thu a puang nghal bawk a. Damdawi ina enkawl mekte pawh a thlawn veka enkawl an nih tur thu a sawi bawk.
India ram hi kuminah a lum hma em em a, April erawh a lum vanglai a ni thin hrim hrim tho va. February liam ta kha kum 1901 hnu lama February a lum ber thla a ni tih weather department chuan an lo puang tawh a, March leh May inkarah khaw lum tak a awm leh thei tih an lo sawi lawk tawh bawk.
April leh May chawhma lam hi a nih dan pangngaiah India a lum vanglai a ni a, May chawhnu atang chuan ruah a tlak tan deuh tawh thin avangin a ziaawm a. June leh September inkar phei chu furpui hun lai a ni.