Khaw lum vangin chawimawina hlan inkhawma tel mi 11 thi

India-a Maharashtra-ah chawimawina sem inkhawma tel zinga mi 11 chu khaw lum leh ni sa lutuk avangin an thi a, mi dang eng emaw zat damdawi inah dah an ni bawk.

Sorkarin a buatsaih inkhawm hi a chung zar awm lo mualah neih niin ni a sa na hle a, darkar eng emaw zat hun hman a ni.

Pathiannia hun hmanah hian mi tam tak an tel a, vantlang tana hna thawk thate chawimawina hlan an ni.

He hun hman hnuah hian a tel zinga tam tak chuan tui an tlakchham nasat thu leh khaw lum lutuk kaihhnawih awm nawm lohna an neih zui thu an sawi.

India sumdawnna khawpui, Mumbai dai maia awm, hun an hmanna hmun, Navi Mumbai hi Pathianniah khan a lum lai berin 38°C a ni a. Hriselna lama mi thiamte chuan mipuite chu India rama khua a lum zual lai, April thla velah chuan ni sat vanglai, April velah chuan chawhma dar 11:00 leh tlai dar 4:00 inkarah ni sa do tam lo turin an ngen.

Chawimawina hlan inkhawm thlalak darhah chuan mi sang chuang chu tualah, a chung zarna engmah awm lovin an thukhawm tawp a ni.

Thuneitute chuan hun hmannaah hian ei leh in tur chhawp a ni a, damdawi inenkawlna mamawh thut an awma pan theih turin booth an siam bawk tih an sawi a. Hetih lai hian eptu party-te chuan ruahmanna mumal siam lova huaihawt a nih thu leh kum khata a lum lai ber huna ni hliahtu awm lohnaa buatsaih a ni chu an sawisel.

Inkhawm hi Kharghar International Corporate Park tual zawlah neih niin Appasaheb Dharmadhikari tia hriat lar, social worker Dattatreya Narayan Dharmadhikari-a chawimawi a ni.

Politician hlun tak tak pawh telin Union Home Minister Amit Shah bakah an state-a rorel lai, BJP hruaitute pawh an tel.

Tual chhung chanchinbute chuan darkar thum chuang ni saah hun hman a ni tih an tar lang a. Mi dang tam tak pawhin tui an tlachham a, an thisen a sang a, an lungphu a dik lo tih an sawi a, mi 20 bawr vel damdawi inah dah luh an ngai hial a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427