Aizawl : Thawhtannia Mizo Hnam Run inkhawmah MNF President hian an party-ah mi thar eng emaw zat lawm lutin thu a sawi a, ‘Pathian leh kan ram tan titu kan ni’ tiin an party chu a par vul zel a, anmahni dotute hian an do an hre lo niin a sawi.
MNF President hian zam lo turin party mipuite fuihin, “Min dotute hian an do an hre lo. Thuthlung an do a ni zawk. Zam suh u! Pu Laldenga te, Pu Zoramthanga te that vang a ni lo. Hruaitute hi chu kan la ral vek dawn. MNF din chhan leh auhla chu Pathian leh kan ram tan, tih a ni,” tia sawiin, hnam thuthlung meichher chu a ral loh tur thu a sawi.
Anmahni beitute hian an do an hre lo nia sawiin Zoramthanga hian, “Hmana thubuai hluite kha an thukphum lum leh a. Zoramthanga hi tichhe vek mah se, hnam thuthlung chu a ral lo vang. An doa hi Pathian leh kan ram tan tih thuthlung vuan tlattu a ni. A mihringte hi fel tak kan ni lo, mahse, ram leh hnam tana bei tlattu leh thuthlung vuan tlattu kan nihna hi kan felnaa pawm a ni,” a ti.
Zoramthanga hian, “MNF an do lo, Zoramthanga an do lo. Pathianin Chanchin tha hril hnathawk tura he hnam a buatsaihna thuthlung an do a ni zawk,” tiin, India sorkar leh sipai general-te pawhin an do hneh loh thuthlung meichher chu do hneh chi a nih loh thu a sawi.
Kum 1966-a ram buai kha pumpelh theih a ni tih sawiin Zoramthanga hian, “Ram buai kha pumpelh theih ni mah se, Pathianin thisena baptist a duh. Under ground leh over ground bakah Zoram chhung leh pawna mite’n kan tuar vek. Hei hi hnam thuthlung tihnghehna a ni. Chanchin tha hril tura min buatsaihna a ni,” a ti a. Party dangte chu kum eng emaw hnuah an ral a, MNF chu kum 62 a kal tawh a, a par vul zel niin a sawi bawk.
Mizo Hnam Run chhung inkhawmah hian Health Minister Dr. R. Lalthangliana pawhin thu a sawi a ni.