Myanmar sipaite chuan an tih dan thin anga kum thar lawmna pualin mi tang 3,113 an chhuah tur thu an puang a, heng zinga 98 hi ram dang mi an ni.
Thawhtannia sipaiten mi tang chhuah tur thu an chhuahah hian February, 2021-a thuneihna an pawng lak duh lotu an mante chhuah an ni ve dawn em tih erawh tar lan tel a ni lo.
Sipaite hian thuneihna an chan hnuah hian anmahni dotu leh mipui rorelna a awm theih nana beitu mi sang tam tak an man tawh a, civil mi 3,240 vel an thi tawh bawk niin activist-te chuan an sawi.
Sipai thupuangtu, Lieutenant General Aung Lin Dwe chuan ‘Myanmar kum thar lawm nana mipuite hlimna siam nan leh mi induhsakna lantir nan mi tang chhuah an ni dawn’ tih a puang a ni.
An mi tang chhuah tur zinga mite hian an chhuah hnuah dan an bawhchhe leh a nih chuan chhuah hma an nih avanga an tan hmabak zawng chu hremna pek belh an nih tur thu a sawi bawk.
A bak, tute nge an chhuah dawn leh engtikah nge tih erawh a sawi lo.
Pawl pakhat, Assistance Association for Political Prisoners chuan sipaite hian anmahni duh lotu mi 17,460 vel an man tawh tih an sawi.
Heng zingah hian mipui hruaitu ber, Nobel Peace Prize pawh lo dawng tawh, Aung San Suu Kyi pawh a tel a. Ani hi sipaiten ro an relna hun hmasa atang tawha mipui tana beitu niin tuna an man lehah hian kum 33 lung in tang tura tih a ni a, ram dangten an dem nasa hle.
Sipai sorkar hian mipui sorkar an paih thlak taka hotu lian tak tak an man nual bawk.
Sipaite hian an mi man chhuahtir hi an nei fo va, kum 2022 khan an chhuah zat hriat a ni lo va, kum 2021 kha chuan Buddhist chawlpuiah hian mi 23,000 chhuah an ni.
Mihring dikna chanvo humhalhtu pawl leh khawvel hruaitute chuan sipaite hi politics avanga an mi man zawng zawngte chhuah vek turin an lo ngen tawh thin.