Tun laiin Mizoramah khua a lum hle a, Aizawlah chuan 33°C a kai chho va; kum tin khaw lum a intan hma hret hret zel bawk.
Directorate of Science & Technology hnuaia State Meteorological Centre-in an chhinchhiah danin April 9 atang khan khua lum tanin Aizawlah chuan 30°C a kai tan a, nimin khan 33°C a kai leh a ni.
The Zozam Times zawhna chhanga Science & Technology hotuten an sawi danin a kum telin khaw lum a nasa chho zel a, nikum khan April 25 atangin 30°C a pel tan a, kuminah erawh khaw lum chu intan hma leh hretin, April 9 atang khan Aizawl lum zawng chu 30°C-ah a kai tawh.
Nikuma khaw lum ni ber, April 28 leh 29-ah 32°C a nih laiin nimina khaw lum lam chu 33°C a ni a, nikuma a lum ni ber aiin a lum tawh zawk.
State Meteorological Centre-in an chhinchhiah danin kum 1985 atanga tun thlenga khaw lum ber kum chu 2017 kha niin hemi kum April 13-ah 36.5°C a ni a, hei hi Mizorama khaw lum ber a ni.
Hetihlai hian State Meteorological Centre-in khaw chin thlir lawknaa a tar lan danin Nilaini leh Ningani lo awm turah hian Mizoram hmun tlem te-ah ruah tlem tlak theihna chance (50%–75%) a awm a; Zirtawpni khian Mizoram hmun thenkhatah ruah tlem tlak theihna chance (50%–75%) a awm bawk.