Chief minister, party khata a thawhpui ni bawk, Ashok Gehlot nena inmil lo tak, Rajasthan Congress hruaitu, Sachin Pilot chu Thawhtannia an party hruaitu lawkte nena an state assembly inthlan tur sawia an inkawmnnaah a tel ve lo.
Pilot-a hian an hetih hlan hian Jaipur daiah hun a hmang daih a. Gehlot, an state-a an party in charge Sukhjinder Singh Randhawa leh Rajasthan Pradesh Congress Committee Govind Singh Dotasra te chuan a mal tetein an MLA-te an kawm a ni.
Thawhtanniah MLA-te kawmnaah hian Pilot-a bial, Tonk pawh MLA pawh kawm tur a tel a; mahse, deputy chief minister hlui hian hun hran daih a hmang.
Pilot-a lamhnai pakhat chuan a hun hman hi an party-in inkawmna hun an ruahman aiin a duang hmasa zawk niin a sawi.
Pilot-a hian kar hmasaah khan an sorkar chu Vasundhara Raje-i kaihhruai BJP sorkar hun laia ei rua puhte chhuina kawnga hma la lovah a lo puh tawh.
Congress war room-ah cabinet minister hlui, Raghu Sharma chuan Pilot-a a inlan ve lo hi dem viau tur a nih loh thu a sawi a. State sorkarin Raje-i kaihhruaina hnuaia ei ru laka hma a la lo tih a sawi pawh dem tur a nih loh thu leh sorkarin chhui ngei se a duh thu a sawi mai tih a sawi.
Congress hian Gehlot-a sorkarin vantlang tana scheme a neihte sawihova inthlan lo awm tur atana chet lak dan tur an dap mek a ni.
Pilot-a hian Parmanand Dham, Shahpura, Jaipur tlawhin sakhaw thiltihnaah a tel hnuah thu a sawi.
Tiba khua, Khetri Tehsil, Jhunjhunu district tlawh lehin Pulwama-a CRPF bus beihnaa sipai thi, Sheoram Gujjar-a lim a hawng zui a. Gujjar-a nupui, Sunita Devi hi B.Ed a ni a, zirtirtu ni mah se tun thlengin state sorkarin hna a la pe lo.