Lirthei huangah chuan a hralh kal zual ho te nena khaikhin chuan hralh tam lutuk loh, sub four meter sedan huanga lirthei pathum Maruti Suzuki Dzire, Honda Amaze leh Tata Tigor te chu chhuan thar model (new generation model) kan hmuh leh hmel a, tunah hian company te hi an inpuahchah mek a, a lo chhuah hun tur erawh a la sawi chian theih loh a ni.
Sub 4 meter sedan te hi sedan lian tham ni si lo, chhiah chawi tam lo tura a dung meter 4 chhunga khung sedan tihna a ni a. Hetiang hi SUV lamah pawh kan hmu a, SUV liantham to tak tak a awm laiin sub-4 meter SUV kan tih, meter 4 chhunga khung Maruti Suzuki Brezza, Tata Nexon leh adangte ang hi a ni a tih theih awm e. Heng chhungah hian tunah hian sedan te chi hi a lar zualah chuan Maruti Suzuki Dzire, Hyundai Aura, Honda Amaze leh Tata Tigor te a ni a. Heng zinga pathumah hian model thar, hmel thar leh thil thar dangte nen kan hmuh hmel a ni.
NEW-GEN HONDA AMAZE
Japanese lirthei siamtu hlun Honda hian kum 2024 bawr velah chuan Honda Amaze thar hi an rawn pholang dawn niin an sawi a, Amaze model thar hian a platform hi Honda midsize SUV lo awm tur a intawm hmel a, hei hi kumin kum laihawl vela hman tan tur a ni a, Amaze-a platform awmsa siam danglam a ni dawn a. A design leh styling ṭhenkhat chu Honda lirthei lar pahnih City leh Accord sedan thar te nen pawh a in zul dawn viau a ni. A chhungah hian 2024 Honda Amaze thar tur hian layout thar a neih hmel a, free-standing touchscreen infotainment system a neih hmel bawk a ni. A khawl lamah chuan 1.2 litre, 4-cylinder naturally aspirated petrol engine (90bhp/110Nm) a hman hmel a, manual leh CVT gearbox option pahnih a awm leh ngei a rinawm bawk a ni.
NEW-GEN MARUTI DZIRE
Generation thar Maruti Dzire hi India rama compact sedan chhuak zingah chuan lei hlawh leh hralh tam a ni a. A chhuan thar model tur hi kum 2024-ah hralh chhuah a nih beisei a ni a, a khawl lamah chuan inthlak danglam lian tak a awm hmel a. 2024 Maruti Dzire thar hian 1.2L, 3-cylinder petrol khawl, Toyota strong hybrid tech a thuam a hman hmel a. Sedan model thar hian a tui heh zawng lamah chuan ARAI-certified mileage 35-40kmpl a pe chhuak dawn a ni. 1.2L, 4-cylinder K12N Dualjet petrol engine awmsa pawh a la hman zel hmel bawk a. A design leh a chhunglamah hian thil hrang hrang tha tak taka an thawm belh a rinawm a ni.
NEW-GEN TATA TIGOR
Thuthang awm mekah chuan Tata Motors hian Tiago hatchback, Tigor compact sedan leh Nexon compact SUV te hi chhuan thar model an tihchhuah hmel a. An tlangzarh hun tur erawh hriat chian a la ni thei lo a. Tata Tigor thar ber hi Alfa (Agile, Light, Flexible, Advanced) platform nghahchhana duan a ni dawn a, hei hi an premium hatchback changkang tak Altroz te pawhin a hman ang a ni. Tunah hian 2024 Tata Tigor chungchangah hian official-a company lam atanga puanchhuah a la awm lem lo a. Mahse, design update mawi tak leh a chhunglam pawh changkang taka a lo chhuah beisei a ni.
Heng kan han tarlan tak te hi a chanchin chiang taka company lam atanga chhuak hriat tur a la awm lo na a model thar te erawh hi chu an rawn chhuah chian hmel a. Kimchang leh dik famkim zawkin company lam thu te pawh a rawn chhuah thuai a rinawm a, lo la ngaihchan zel a ngai rih a ni.