Tripura-ah Thawhlehni atanga Pathianni thleng hian sorkar hnuaia awm sikul zawng zawng chu khaw lum leh ni sa lutuk avangin khar a ni dawn tih Thawhtanni khan sorkarin a puang.
Twitter-ah Chief Minister Manik Shah chuan zirlai naupang tetete taksaa ni sa leh lum lutuk avanga harsatna thleng thei thlirin he thutlukna hi siam a nih thu a tar lang a. Mi mal sikulte pawh he kalphung hi zawm vea tun kar chhung chu inkhar ve turin a ngen.
“State puma khaw lum lutuk hian zirlaite hriselnaah nghawng tha lo a nei thei a. Hemi hi ngaihtuahin state sorkar chuan sorkar enkawl sikul leh grant-in-aid school zawng zawng chu April 18, 2023 leh April 23, 2023 inkara khar turin a ti a ni,” a ti.
“Heng bakah hian mi mal enkawl sikulte pawh hetih chhunga inkhar ve turin kan ngen bawk,” a ti a. College leh university erawh kal dan tihdanglam tumna a awm lo.
Tripura-ah hian sorkar sikul leh sorkarin a puih sikul 4,226-ah zirlai nuai sarih vel inziak lut an awm.
Tripura-ah hian tun hnaiah khua a lum em em a, 39°C pawh kai thei mai tura ngaih a ni a. April 20 thleng hi chuan ruah a la sur dawn lo niin khawchin zirtute chuan an sawi.
Thawhtanniah khan West Bengal Chief Minister Mamata Banerjee pawhin khaw lum leh ni sa lutuk avangin an state-a zirna inte chu kar khat chhung kharna tur thupek a lo chhuah tawh a. Ni rei vak lo liam ta chhungin zirlaiten lu na leh hriselna lama insawiselna neuh neuh an nei hlawm niin a sawi.
India Meteorological Department chuan India ramah hian ni rei vak lo chhung chu khua a la tha ang a, khua pawh a la lum zui rih deuh dawn tih an lo sawi lawk tawh a ni.