Aam Admi Party (AAP) zirlai pawl, Chhatra Yuva Sangharsh Sami (CYSS)-in sorkar sikula lut, pawl riat hnuai lamten zirlaibu an la dawng kim lo chu tha lo an tih thu sawiin pe thuai turin Mizoram sorkar an phut.
AAP zirlai pawl hruaitute chuan nimin khan Aizawl Press Club-ah thuthar thehdarhtute kawmin he thu hi an sawi a. Kum 2023-24 acdemicasession atan zirna inte chu April 5 atang khan hawn ni tawh mah se, tun thlengin sorkar sikul naupang tam takin zirlaibu an la dawng lo niin an sawi.
Nikum lamah pawh zirlaiten zirlaibu an dawn tlai avangin harsatna an lo tawk tawh tih CYSS chuan sawiin, “Sikul thenkhatah phei chuan zirtirtu thahnemngaiten zirlaibu hlui la khawmin an sem nghe nghe,” an ti.
Zirlaibu thenkhat chu bazarah lei tur pawh a awm lo va, tunah hian zirlaibu thenkhat phei chu press-ah an la print mek chauh nia sawiin, zirlaite chu lehkhabu pe thuai turin sorkar an phut a. Zirlaite zirlaibu chu sorkarin a ngaihtuah rang lo a nih chuan na taka hma an lak tur thu CYSS chuan an sawi bawk.
CYSS hruaitute chuan Mizoram sorkar chu zirtute training pe tha lo leh an zirna puitu tur hmanrua pawh pe tha lovah an puh bawk a. Khawi hmunah pawh zirna in chhia leh kalphung tha lo chu sorkar sikul a ni deuh vek nia sawiin, sorkar chu zirna inte ngaihsak tha lovah an puh a ni.