Zaipawl chauhin an sak tura ngaih, ‘Haleluiah Chorus’ ropui tak mai, solo anga hneh taka a sak vanga Zo rimawi khawvel barakhaihtu leh a hnu zela a hla lar tak tak hmanga hming chher zui zaithiam duhawm Lalfakkimi (Mafaki) kum 34, chu April 16, 2023 Pathianni khan Republic Hmar veng-a a In luahah thiin chhar a ni.
Mafaki hi a țhenawm ten a zîng tho an hmu mai lo a, a thawm a reh zui em avangin a chhûng te an hrilh a, a chhûng te hian an phone a, a chhang ta si lova, an ngaih țha lo chuan YMA punin, a in kawngkhar an tichhia a, khumah thiin an va hmu ta a ni. An va hmuh hian a taksa pawh a lo khawng tawh niin an sawi.
Mafaki hi Republic Hmar vêng, T. Romana College hlui thlangah amahin in a luah a, a ruang hi Tripura, Tlângsâng khûaah nimin khan thlenpui a ni.
A chhûngte chuan tunhmain hrisel lohna a neih loh thu an sawi a, BP sang erawh a nei niin an sawi.
Mafaki hi Lalthanliana (L) leh Ramdinfeli te fanu a ni a, Baptist Kohhranah lawiin; a thih chhan hi Stroke vang a ni. A thih hun an tarlanah chuan 16.4.2023 dâr 6:00 p.m tih a ni.
MDM-in an member thlahna thuchhuah siam
Music Domain Mizoram (MDM) chuan an member Lalfakkimi Sailo Mafaki Kum 34, Tlangsang, Tripura in April ni 16, 2023 zan dar 6pm a Republic Veng, Aizawla a chenna in-a mihring ngaih a hunlo an la tih em em laia, van kohna min chhan sak mai hi mihring lam ngaihtuahna atang chuan an tuar hle a; a kalsan tak a chhungte hnenah Pathian thlamuanna leh awmpuina lo thleng se tih chu an tawngtaina a nih thu thuchhuah an siam.
MDM in Mizo Rimawi tana theih tawp a chhuah hlim atangin Mafaki hi Mizo Rimawi hmasawnna duhtu leh pawl tana thahnem ngai leh inpe tak a nih thu te, kum 2023 MDM Calendar atana nikum kum tawpa Photo Shoot an neih chu pawl anga a Activities hnuhnung ber a nih tak bakah, kumin June thla ah Mafaki te thlalak hi MDM Calendar ah hian a chuang a. MDM chuan Mafaki hi puana tuamin, MDM dan bu in a sawi ang a Chhiatni/Thatni a inkaihhruaina kan neih ang in an thlahliam a,
Zoram dung leh vanga amah ngaisanga, Mafaki kaltlanga Pathian hnathawh lo hmu tawh thinte MDM chuan an tawrhpui a, a fak thin Pa ang chhung ah thlamuang takin a chawl ngei ang, tiin an thuchhuah ah hian an tarlang bawk.